Семей жастарына «Жұмсақ күш феномені» тақырыбында дәріс оқылды

2025 жылдың 8 қараша күні Қытайтану кафедрасы менгерушісінің оқу-әдістемелік және тәрбие жұмысы жөніндегі орынбасары Керимбаев Е.А арнайы шақырумен барып Семей қаласының жастарына дәріс оқыды. Дәрістің тақырыбы кафедра ғалымының зерттеп жүрген бағытымен үндес - «Жұмсақ күш феномені» деп аталады. Жиынға Семей қаласының жоғарғы оқу орындарының студенттері мен қаладағы «Асық», «Оқырман», «Таным» сияқты оқырмандар клубының мүшелері, түрлі қызметтегі осы тақырыпқа қызығушылық танытқан адамдар қатысты. Олардың қатарында жоғарғы оқу орындарының оқытушылары мен мектеп мұғалімдері де көп болды.
        Кафедрамыздың аға оқытушысы PhD доктор Керімбаев бүгінгі күні әлемдік аренада күннен күнге бәсі артып келе жатқан «жұмсақ күш» феномені туралы жан-жақты қызықты ақпараттармен бөлісті. Оның маңызы мен мәніне, шығу қайнарына, ерекшелігіне, даму сатыларына және бүгінгі күні сол күшті өзінің саясатында қолданып отырған мемлекеттерге тоқталып өтті. Соңғы кезде әлем назарын өзіне аударып отырған қазақтың да жұмсақ күш потенциалы біршама сөз болды. Дәріс тыңдаушылардың зор қызығушылығы мен ықыласын тудырды. Дәріс соңынан көптеген сұрақтар қойылды.
 Семей қаласының Абай кітапханасында өткен бұл жиынға Абай обылысы Жастар саясаты басқармасының басшысы Олжас Бейсенбай келіп қатысып, соңынан сөз сөйлеп, сый-құрметін көрсетті. Осындай жауапты мекемені басқарып отырған, Президенттік жастар кадр резервінің мүшесі Олжас Бейсенбайдың  Шығыстану факультеті Қытайтану кафедрасының түлегі екенін айтып кеткеніміз дұрыс.