Жоба зерттеу тобының мүшелері Шанхай қаласына ғылыми іс-сапар жасады.

2025 жылдың қазан айының екінші жартысында әл-Фараби атындағы Қазақ ұлттық университеті, Шығыстану факультетінің Қытайтану кафедрасының доцент-зерттеушілері, PhD Дәуен Д.Б., Асыл М.Б. және аға оқытушысы А.М.Нуржаева Қытай Халық Республикасы, Шанхай қаласында ғылыми іс-сапарда болды. Іс-сапар ЖТН AP27511021 «Қытайдың Қазақстанға қатысты мәдени дипломатиясының қарқындылық эволюциясы: мүмкіндіктері мен сын-қатерлері» атты ғылыми жобасы шеңберінде жүзеге асырылды.

Іссапар екі негізгі бағыт бойынша өтті. 18–24 қазан аралығында зерттеуші Д.Б.Дәуен Дүниежүзілік қытайтану орталығы ұйымдастырған халықаралық конференцияға қатысып, әлемнің түкпір-түкпірінен жиналған синологтармен пікір алмасты. Конференцияда Дәуен Д.Б. «Қазақстан қытайтануының дамуы және оның Қазақстан–Қытай мәдени және білім беру байланыстарына ықпалы» атты баяндамасын ұсынды. Сонымен қатар Қазақстандағы Қытайды зерттеу жағдайы таныстырылып, шетелдік әріптестермен кәсіби ынтымақтастық бағыттары талқыланды. Зерттеуші әлемдік қытайтану орталығы тарапынан Орталық Азия қытайтануының алғашқы форумын ұйымдастырудағы жұмысы үшін марапатқа ие болды.

25–31 қазан күндері іс-сапар Шығыс Қытай педагогикалық университетінде (East China Normal University, ECNU) жалғасты. Қазақстанды зерттеу орталығында және халықаралық қатынастар факультетінде бірқатар ғылыми кездесулер өткізілді. Қазақстандық жас зерттеушілер орталықтың ағымдағы жобаларымен танысып, Қытай мен Қазақстан арасындағы мәдени дипломатия, гуманитарлық алмасулар және өңірлік ынтымақтастық мәселелері бойынша талқылаулар жүргізді.

Іссапар барысында зерттеушілер CNKI деректер базасымен, ШҚПУ кітапханасының қорымен және Шанхай қаласындағы ғылыми орталықтармен жұмыс істеп, жобаға қажетті жаңа әдебиеттер мен аналитикалық материалдар жинады. «Жаңа кезеңдегі Қытай мен Қазақстан арасындағы гуманитарлық байланыстарды ілгерілету» атты дөңгелек үстелге қатысып, мәдени дипломатияның рөлі мен академиялық байланыстарды кеңейту мәселелерін талқылады.

Шығыс Қытай педагогикалық университетінің өкілдерімен екіжақты ғылыми ынтымақтастықты дамыту мақсатында бірлескен семинарлар, ғылыми тағылымдамалар және халықаралық жарияланымдар дайындау секілді бағыттар қарастырылды. Университет докторанттары мен магистранттарын Қытайда ғылыми тағылымдамадан өткізу мүмкіндігі де талқыланды.

Іссапар нәтижесінде жоба аясында болашақта дайындалатын зерттеулер үшін құнды дереккөздер жиналып, Қытайдың Қазақстанға қатысты мәдени дипломатиясы бойынша жаңа аналитикалық материалдар қалыптастырылды. Сонымен бірге Қытайлық ғылыми орталықтармен тұрақты академиялық байланыстар орнатылды.

Шанхайдағы іссапар зерттеу тобы жұмысының сапасын арттыруға, ғылыми дерекқорды кеңейтуге және Қазақстан мен Қытай арасындағы ғылыми әріптестікті нығайтуға елеулі үлес қосты.