ШЫҒЫСТАНУ ФАКУЛТЕТІНДЕ КЕЗЕКТІ ӘДЕБИ-ПОЭЗИЯЛЫҚ ШАРА «ИҚБАЛ ОҚУЛАРЫ» ӨТКІЗІЛДІ

2025 жылдың 17-18 қарашасында әл-Фараби атындағы ҚазҰУ Шығыстану факультетінде Пәкістанның ұлттық ақыны Мұхаммед Иқбал күніне орай «Иқбал окулары» атты әдеби-поэзиялық шарасы өткізілді «Иқбал оқуларының» басты мақсаты – мәдени мұраны дәріптеу, екі мемлекет арасындағы достықты нығайту және студенттерді шығыс әдебиеті мен философиясын меңгеруге ынталандыру.

Бағдарламаның алғашқы күні Пәкістандағы Заманауи Ұлттық Тілдер университетінің (NUML) Тілдер факультетімен бірлескен ZOOM-конференция ұйымдастырылды. Әдеби-поэзиялық кездесуде Шығыстану факультетінің деканы, т.ғ.к. Эгамбердиева М.Ш. құттықтау сөзімен бастап, қазақ және пәкістандық студенттердің мәдени байланысын нығайтудың маңыздылығы атап өтті.

Кездесу барысында екі университеттің де  урду бөлімінің студенттері Мұхаммед Иқбалдың өлеңдерін мәнерлеп оқып, ақын шығармашылығы туралы пікірлерін ортаға салды. Шығыстану факультетінің студенттері Маканов Алихан, Абдулдаева Аружан, Нұрлан Айбике және Ырысбай Абылай ақынның классикалық назмдарын жатқа мәнерлеп оқыды. Пәкістандық студенттер тарапынан да ақынның өлеңдеріне түсіндірмелер берілді. Шара соңында екі университеттің студенттері достық лебіздерімен алмасып, Нұрлан Айбикенің мили нағма музыкалық нөмірімен аяқтады.

Шараның екінші күні кездесу Шығыстану факультетінің Мұхаммед Али Джинна орталығында жалғасты. Бұл әдеби отырысқа Асфендияров атындағы медицина университетінің пәкістандық студенттері мен ҚазҰУ урду тілі бөлімінің студенттері қатысып, Иқбал шығармашылығына арналған өлең оқу мен пікірталас өткізілді. Мұндай мәдени кездесулердің жас буынның шығармашылық дамуына және қоғамдық мәдениеттің өсуіне ықпал ететіні атап өтілді.

Іс-шара соңында факультет деканы белсенділік танытқан студенттерге сертификаттар табысталып, қатысушыларға алғыс білдірілді.