«Smart Campus» жобасы қарастырылды

Әл-Фараби атындағы Қазақ ұлттық университетінің Басқарма Төрағасы – Ректор Жансейіт Түймебаев қытайлық H3C компаниясының Қазақстандағы өкілдігінің басшысы Чен Янлинмен кездесті.

Тараптар университет қалашығының заманауи цифрлық инфрақұрылымын қалыптастыруға бағытталған «Smart Campus» жобасын іске қосу мәселелерін талқылады. Атап айтқанда интеллектуалды желілік архитектураны құру, сымсыз байланыс технологияларын кезең-кезеңімен енгізу және цифрлық сервистердің қолжетімділігін арттыру бойынша бірлескен жұмыс бағыттары қарастырылды.

Оқу ордасының басшысы Жансейіт Түймебаев ҚазҰУ-дың білім, ғылым және инновация салаларындағы стратегиялық мақсаттарына тоқталып, цифрландыру университет дамуының негізгі басымдықтарының бірі екенін атап өтті. Жаңа технологияларды енгізу оқу үдерісінің тиімділігін арттырып қана қоймай, студенттер мен оқытушыларға арналған бірыңғай ыңғайлы цифрлық экожүйе қалыптастыруға мүмкіндік береді.

Өз кезегінде H3C компаниясының өкілі Чен Янлин халықаралық тәжірибеге сүйене отырып, жоғары оқу орындары үшін интеллектуалды инфрақұрылым құрудың заманауи шешімдерін таныстырды.

Тараптар «Smart Campus» тұжырымдамасы аясында пилоттық жобаларды іске асыру, жаңа цифрлық платформаларды енгізу, ақпараттық қауіпсіздікті күшейту және оқу ортасын автоматтандыру бағыттары бойынша бірлескен жұмысты жалғастыруға уағдаласты.

Әл-Фараби атындағы ҚазҰУ-дың Баспасөз қызметі