Су дипломатиясы бойынша магистрлік бағдарламаны әзірлеу жөніндегі өңірлік семинарға қатысу

2025 жылғы 18 желтоқсанда Ташкент қаласында (Өзбекстан Республикасы) география және табиғатты пайдалану факультетінің оқытушылары «Орталық Азия елдерінде су дипломатиясы бойынша магистрлік бағдарламаны әзірлеуді талқылау» тақырыбындағы өңірлік семинарға қатысты. Іс-шара халықаралық су ресурстарын басқару институты (IWMI) тарапынан Blue Peace Central Asia (BPCA) бастамасы аясында ұйымдастырылды. Аталған бастама Швейцарияның даму және ынтымақтастық агенттігінің (SDC) қолдауымен жүзеге асырылып, өңірлік ынтымақтастықты нығайтуға және су ресурстарын басқару саласындағы адами әлеуетті дамытуға бағытталған.

Семинар БҰҰ-ның ТДМ іске асыру аясында өткізілді, атап айтқанда: ТДМ 6 «Таза су және санитария» – су ресурстарын орнықты басқаруды қамтамасыз ету; ТДМ 16 «Бейбітшілік, әділеттілік және тиімді институттар» – диалог, келіссөздер және институционалдық өзара іс-қимыл тетіктерін дамыту; ТДМ 17 «Тұрақты даму жолындағы әріптестік» – Орталық Азия өңіріндегі мемлекетаралық және университетаралық ынтымақтастықты нығайту.

Семинар жұмысына Қазақстан, Қырғызстан, Тәжікстан, Түрікменстан және Өзбекстанның жетекші жоғары оқу орындарының өкілдері, сондай-ақ су ресурстары, орнықты даму, мемлекеттік басқару және халықаралық ынтымақтастық саласындағы сарапшылар қатысты. Іс-шара барысында климаттың өзгеруі, трансшекаралық су пайдалану және су экожүйелеріне түсетін жүктеменің артуы сияқты өңірлік және жаһандық сын-қатерлерге жауап беретін су дипломатиясы бойынша пәнаралық магистрлік бағдарламаны қалыптастыру мәселелеріне ерекше назар аударылды. Семинар аясында сабақтас білім беру бағдарламаларын әзірлеудің халықаралық тәжірибесі, өңірлік университеттердің білім беру және ғылыми әлеуеті, сондай-ақ болашақ бағдарламаның негізгі мазмұндық модульдері – гидрология мен су ресурстарын басқарудан бастап халықаралық су құқығы, әлеуметтік-экономикалық аспектілер және келіссөз жүргізу тәжірибелеріне дейінгі бағыттар талқыланды.

География және табиғатты пайдалану факультетінің оқытушылары университеттің су ресурстары, орнықты даму және табиғи қауіп-қатерлерді басқару саласындағы мамандарды даярлау тәжірибесін ұсынып, оқу жоспарының құрылымын келісу және университетаралық ынтымақтастықтың келесі кезеңдерін айқындауға бағытталған тақырыптық топтардың жұмысына белсенді қатысты. Семинар қорытындысы бойынша су дипломатиясы саласында Орталық Азияның келісілген жоғары білім кеңістігін қалыптастырудың маңыздылығы жөнінде ортақ түсінікке қол жеткізіліп, үйлестірілген оқу жоспарын әзірлеу және университетаралық өзара іс-қимылды дамыту бойынша алдағы қадамдар айқындалды. Бұл бастамалар өңірлік деңгейде басым ТДМ-ға қол жеткізуге елеулі үлес қосады.