Физика-техникалық факультетінің магистранттары, докторанттары және профессор-оқытушылар құрамы білім беру грантын өтеу мәселелері бойынша вебинарға қатысты. ТДМ 4 және ТДМ 8

24 желтоқсанда Әл-Фараби атындағы Қазақ ұлттық университетінің Физика-техникалық факультетінің магистранттары, докторанттары және профессор-оқытушылар құрамы Университеттің Кәсіби даму және мансап офисі ұйымдастырған онлайн-вебинарға қатысты. Іс-шара ағымдағы семестрде оқуын аяқтайтын білім алушылар үшін мемлекеттік білім беру грантын өтеу мәселелеріне арналды.

Вебинар аясында қатысушыларға төмендегі негізгі мәселелер бойынша түсіндірмелер берілді:

• грантты міндетті өтеудің тәртібі мен шарттары;
• өтеуге жататын түлектер мен жас мамандардың санаттары;
• өтеуден босату, мерзімін кейінге қалдыру немесе ұзарту үшін мүмкін болатын негіздер;
• түлектердің жиі қоятын сұрақтары және оқу аяқталғаннан кейінгі іс-қимылдар бойынша практикалық ұсынымдар.

❗ Еске саламыз, мемлекеттік білім беру гранты бойынша оқуын аяқтаған түлектер мен білім алушылар үш жылдық міндетті өтеуден өтуге міндетті. Бұл талап келесі нормативтік-құқықтық актілермен реттеледі:

1. Қазақстан Республикасының «Білім туралы» Заңы, 47-бап, 17–17.4-тармақтар;
2. Қазақстан Республикасы Ғылым және жоғары білім министрінің м.а. 2023 жылғы 11 тамыздағы № 403 бұйрығы «Грантты өтеу қағидалары».

Вебинар барысында ұсынылған материалдарға сәйкес, грантты өтеу мерзімі 3 жылды құрайды және оны бақылауды «Қаржы орталығы» АҚ жүзеге асырады. Сонымен қатар бакалавриат, магистратура және докторантура түлектері үшін, оның ішінде мемлекеттік және нысаналы тапсырыс бойынша оқыған білім алушыларға қатысты өтеу шарттары, сондай-ақ еңбек қызметін жүзеге асыруға болатын ұйымдардың тізбесі түсіндірілді.

Міндетті өтеуден босатылатын тұлғалар санаттарына және өтеу мерзімін кейінге қалдыру жағдайларына, оның ішінде оқуын жалғастыру, декреттік демалыс және мерзімді әскери қызметтен өту мәселелеріне ерекше назар аударылды.

Аталған вебинарды өткізу білім алушылардың құқықтық және кәсіби сауаттылығын арттыруға ықпал етеді және мемлекеттік білім беру гранты бойынша міндеттемелерді саналы түрде орындауға бағытталған.

БҰҰ-ның Тұрақты даму мақсаттарына (ТДМ) қосқан үлесі

Іс-шара БҰҰ-ның келесі Тұрақты даму мақсаттарына қол жеткізуге ықпал етеді:

• ТДМ 4 — Сапалы білім: ақпаратқа тең қолжетімділікті қамтамасыз ету және түлектерді кәсіби қызметке көшу кезеңінде қолдау;
• ТДМ 8 — Лайықты жұмыс және экономикалық өсу: жас мамандарды жұмыспен қамтуға жәрдемдесу және олардың еңбек нарығына интеграциялануына қолдау көрсету.

Физика-техникалық факультет оқуын аяқтап жатқан барлық магистранттар мен докторанттарға нормативтік талаптармен мұқият танысуды және осындай түсіндіру іс-шараларына белсенді қатысуды ұсынады.