Егемен Қазақстан

«Кереметтің» кереметтері. Әл-Фараби атындағы Қазақ ұлттық университетінде бірегей инновациялық «Al—Farabi university smart city» жобасы аясында «Керемет» студенттерге қызмет көрсету орталығы бой көтерді. Орталық ұлы ғұлама Әбу Насыр әл-Фарабидің «Қайы­рымды қала туралы» трак­таты­ның идеологиясына негіз­деліп өмірге келді. Бүгінде оқу-ағарту­шылық, әлеуметтік-тұр­мыстық, медициналық, мәдени-демалыстық бағыттағы қыз­мет­тер ұсынатын орталықтың қыз­метіне университеттің оқыту­шы-профессорлық құрамы, қыз­мет­керлері мен студенттері дән риза. Оқу-ағартушылық бағыт бойын­ша «бір терезе» қағидасы негізінде тіркеуші кеңсесі мен студент кеңсесі өз қызметтерін көр­сетеді. Құрылымы жағынан студент кеңсесінде студенттік бөлім, халықаралық академиялық ұтқырлықты қамтамасыз ету секторы, әскери-жұмылдыру бөлімі, төлқұжат үстелі, бухгалтерия, Бизнес және мансап орталығы, сондай-ақ, ХҚО мобилдік бөлім­шелері бар. Студенттер қалашығы – Ұлт­тық университет қабырғасында 17000-нан астам студент білім алады. Қалашықтағы «Керемет» студенттерге қызмет көрсету орталығында әлеуметтік дүкеннің іске қосылғанын атап өткен жөн. Әлеуметтік дүкен студенттер мен оқытушыларға тауарлар мен өнімдерді және әлеуметтік-тұр­мыстық қызметтерді нарық­тағыдан төмен бағада сатып алуға мүмкіндік береді. Бүгінгідей, күрделі экономикалық жағдайда, осындай дүкеннің ашылуы, жас­тарға қолдау көрсетудің оңтайлы жолы болмақ. Бұл әлеуметтік дүкен орталықтың барлық әлеуметтік-тұрмыстық бағытта көрсететін жалпы қызметтерін көрсетеді. Әлеуметтік-тұрмыстық бағыт­та көрсетілетін қызметтердің саны алуан түрлі. Олардың қатарында банк, дәріхана, заңгер, нотариус, әуе, теміржол кассасы мен туристік фирма қызметтері бар. Кітап дүкені, фотостудия, сән салоны мен кір жуатын орын, супермаркет, студенттік асхана, ателье қызметтері бүгінде барлық қауымның ықласына бөленіп отыр. Өз жұмыстарын жаңа бастап, жанданып келе жатқан бұл нысандар әрі қарай да сапалы қызмет көрсете беретіні анық. Студенттердің көңілді де, пайдалы демалысын ұйымдастыру мақсатында орталықта мәдени-демалыстық бағытта қызмет көрсе­тетін кинотеатр жұмыс істейді. Медициналық бағыттағы қыз­мет­терді ұлттық университеттің оңтүстіккореялық серіктестері – Сеул ұлттық университеті және Енсе университеттерімен жасалған арадағы табысты әріптестіктің нәтижесі болған диагностикалық орталық көрсетеді. Диагнос­тикалық орталық пациенттерге диагностика жасаудың ең жоғарғы деңгейін қамтамасыз ете алатын жаңа медициналық құрал-жабдықтармен жабдықталған. Аталмыш орталық университетте жақында ашылған Қоғамдық денсаулық сақтау жоғары мекте­бінің медико-биологиялық клас­терінің маңызды құрамдас бөлігі болып табылады. Бүгінде «Керемет» қызмет көрсету орталығы «аты затына сай», студенттерге барлық оқу-ағартушылық, әлеуметтік-тұр­мыстық, медициналық, мәде­ни-демалыстық бағыттағы қызмет­терді орталықтандырылған бір орында көрсететін бірден-бір таптырмас орын болып отыр. Сон­дықтан да болар, жақында орталықта сапармен болып қайт­қан Қазақстан Республикасының Вице-премьері Д.Н.Назарбаева: «Ұлт­тық универ­ситетте бастама көтерген бұл модельдің студенттер өмірінің қо­лайлы жағдайын қамтамасыз етуге ұмтылған қазақстандық жоғары оқу орындары үшін үлгі» болатынын атап өтті. «Керемет» – ол студенттер мен оқытушы-профессорлық құрамына сапалы қызметтер ұсынушы, әлеуметтік маңызды қызметтердің кең спектрін біріктірген университет қабырғасында құрылған әлемдегі бірден-бір бірегей орта­лық. Ендеше, бірегей орталықтың бірегей бастамаларға айнала бере­тініне сенім мол. Сайран БАЯНДИНОВА, «Керемет» студенттерге қызмет көрсету орталығының директоры АЛМАТЫ