1-курс студенттері оқытушы Қайратқызы Динаның жетекшілігімен Абай атындағы мемлекеттік академиялық опера және балет театрына барып қайтты.

2025 жылдың 30 қарашасында «Ақпараттық қауіпсіздік жүйелері» және «Механика» мамандықтарының 1-курс студенттері оқытушы Қайратқызы Динаның жетекшілігімен Абай атындағы мемлекеттік академиялық опера және балет театрына барып қайтты. Іс-шараның басты мақсаты – студенттердің әлемдік музыкалық мәдениетке қызығушылығын арттыру, эстетикалық талғамын қалыптастыру және рухани дамуына ықпал ету болды.

Студенттер италиялық композитор Гаэтано Доницеттидің «Дон Паскуале» атты комикалық операсын тамашалады. Қойылым көрермендердің көңілінен шықты: актерлердің әсерлі ойыны, жоғары деңгейдегі вокалдық орындау, көркем костюмдер мен оркестрдің тірі орындауы итальян классикасының ерекше рухын жеткізді.

Бұл театрға бару студенттер үшін маңызды мәдени оқиға болды. Ол олардың көркемдік талғамын дамытуға, әлемдік өнерге деген құрметін арттыруға және жалпы мәдени көкжиегін кеңейтуге ықпал етті. Көптеген студенттер операны алғаш рет тамашалап, музыка мен сахналық өнердің үйлесімін жоғары бағалады.

Іс-шара жоғары деңгейде өтті. Студенттер алған әсерлерімен бөлісіп, осындай мәдени іс-шараларға жиі қатысуға ниет білдірді. Театрға бару олардың рухани және эстетикалық дамуына оң әсерін тигізді.