Физика-техникалық факультетте жаңа Конституция жобасын талқылауға арналған дөңгелек үстел өтті

Әл-Фараби атындағы Қазақ ұлттық университетінің физика-техникалық факультетінде Қазақстан Республикасының жаңа Конституциясы жобасын талқылауға арналған дөңгелек үстел өтті.

Спикерлер:

• физика-техникалық факультетінің деканы, ф.-м.ғ.к., профессор Нұрзада Әбдібекқызы Бейсен;

• қатты дене физикасы және жаңа материалдар технологиясы кафедрасының ф.-м.ғ.д., профессор Гүлмира Шарифовна Яр-Мухаммедова.

Іс-шара барысында қатысушылар қоғамдық талқылауға ұсынылған Конституция жобасының негізгі ережелерін, сондай-ақ оның елдің құқықтық жүйесі мен демократиялық институттарын одан әрі дамытудағы маңызын талқылады.

Конституцияның жаңа редакциясы жобасында білім беру тек әлеуметтік кепілдік ретінде ғана емес, мемлекеттің дамуына бағытталған стратегиялық ресурс ретінде қарастырылады. Университеттердің ғылыми сараптама, қоғамдық диалог және азаматтық жауапкершілікті қалыптастыру орталықтары ретіндегі рөліне деген түсінік күшейе түседі. Ғылым инновациялық және технологиялық прогрестің негізі ретінде айқын мәртебеге ие болып, академиялық еркіндік пен зияткерлік меншік құқықтарын қорғау маңызды қағидаттар ретінде бекітіледі.

Академиялық қауымдастықтың қоғамдық маңызы бар бастамаларды ашық әрі сындарлы талқылауға арналған алаң ретіндегі рөліне, сондай-ақ жоғары оқу орындарының жастардың азаматтық жауапкершілігі мен құқықтық санасын қалыптастырудағы үлесіне ерекше назар аударылды. Конституцияның жаңа жобасында көзделген өзгерістер білім беру сапасын арттыруға, зерттеу ортасын дамытуға және ғылымды елдің тұрақты даму міндеттерімен интеграциялауға бағытталған. Осы тұрғыда университеттер азаматтық қоғамның негізгі институттары ретінде айқындалады.

Университет қабырғасында өткен Конституция жобасын талқылау ғылыми-білім беру қауымдастығын елдің қоғамдық-саяси даму үдерістеріне тартудың маңызды тетігіне айналды.