Жаңа дәріс залы мен оқу зертханасы ашылды

Әл-Фараби атындағы ҚазҰУ-дың физика-техникалық факультеті Плазма физикасы, нанотехнология және компьютерлік физика кафедрасында саналы ғұмырын физика білімін дамытуға арнаған көрнекті ғалым, профессор Жұманов Кеңес Болатқұлұлының 90 жылдық мерейтойына орай, дәріс залы мен оқу зертханасының ашылуы өтті.

Салтанатты шараға ҚазҰУ Басқарма мүшесі – ғылым және инновациялық қызмет жөніндегі проректор Марғұлан Ибраимов, физика-техникалық факультетінің профессорлары мен оқытушылары, Қазақстан физикалық қоғамының өкілдері, профессор Кеңес Жұманов, туған-туыстары, әріптестері мен достары, EQUUS Petroluim Ltd компаниясының бас атқарушы директоры, «Құмкөл Транс Сервис» ЖШС акционері  Нұрлан Жұманов және студенттер қатысты.

Салтанатты рәсім факультеттің бесінші қабатындағы №519 және №521 аудиториялар алдында басталды. Қонақтарға жаңартылған дәрісханалар, «Атомдық физика және нанотехнологиялар» оқу зертханасы, сондай-ақ студенттерге арналған заманауи коворкинг аймағы таныстырылды. Оқу және инфрақұрылымдық мүмкіндіктердің таныстырылымын физика-техникалық факультетінің деканы Нұрзада Бейсен өткізді.

Құттықтау және ізгі лебіздерімен Әл-Фараби атындағы ҚазҰУ-дың ғылыми-инновациялық қызмет жөніндегі проректоры Марғұлан Ибраимов, Қазақстан физикалық қоғамының өкілдері, Плазма физикасы, нанотехнология және компьютерлік физика кафедрасының меңгерушісі Сандуғаш Коданова, профессор Есенгелді Меңліғазиев, сондай-ақ Нұрлан Жұманов және т.б. сөз сөйледі.

Кеңес Жұманов 1936 жылы 5 ақпанда Алматы облысының Белбұлақ ауылында дүниеге келген. 1954-59 жылдары С.М.Киров атындағы Қазақ мемлекеттік университетінің физика факультетінде білім алып, еңбек жолын осы оқу орнында оптика және плазма физикасы саласында бастады. 1973 жылы кандидаттық диссертациясын сәтті қорғады.

1978 жылы доцент, ал 2002 жылдан бастап профессор ғылыми атағын иеленді. 1994-96 жылдары кафедра меңгерушісі қызметін атқарып, жалпы оқу курстары бойынша кафедраның оқу-әдістемелік базасын нығайтуға ерекше көңіл бөлді. Ғалым 50-ге жуық ғылыми және оқу-әдістемелік еңбектің авторы, оның ішінде оқулықтар, электрондық оқу құралдары және Қазақстан ұлттық энциклопедиясына енген мақалалар бар. Оның ғылыми-педагогикалық мұрасы отандық физика ғылымы мен жоғары білімнің дамуына қосылған елеулі үлес болып табылады.

Дәріс залын, «Атомдық физика және нанотехнология» оқу зертханасын және студенттерге арналған коворкинг орталығын заманауи үлгіде жабдықтауға профессор Кеңес Жұмановтың ұлы, физика-техникалық факультетінің 1991 жылғы түлегі, «KazMunayTradeExpo» ЖШС бас директоры Нұрлан Жұманов толық демеушілік көрсетті.

Іс-шара барысында ұстаз-ғалымның ұзақ жылдық еңбек жолы мен жетістіктері атап өтіліп, университет басшылығы атынан профессор Кеңес Жұмановқа ғылымға адалдығы және отандық физикалық білім беруді дамытуға қосқан елеулі үлесі үшін зор алғыс білдірілді.

 Әл-Фараби атындағы ҚазҰУ-дың Баспасөз қызметі