«Айналаңды нұрландыр!». Аз уақыт ішінде елге кеңінен танылған «Айналаңды нұрландыр!» жобасына университет факультеттері, ұстаздары мен студенттері көп үлес қосты. Бес жылдық мерейтойын салтанатты түрде атап өткен шараға «Үздік факультет» атанған факультет декандары мен «Үздік ғылыми жоба» атанған студенттер жұмысы таныстырылды. Жобаны алғаш ұсынып, бастамашы болған ҚазҰУ ректоры Ғ.Мұтанов ғылыми ұсыныстардың бәрі де іске асырылып, әкімшілік тарапынан кең қолдау табатынын мақтаныш сезіммен айтты. Салтанатты шара барысында аталмыш жобаның осы күнге дейінгі жетістіктері айтылды. Жыл өткен сайын, студент жастардың белсенділігі артып, нағыз халықтық жобаға айналғаны қуантады. Жоба басталғаннан университет кафедралары арасында үлкен қолдауға ие болып , тіл білімі кафедралары арасында жыл сайын мерекелік апталық ретінде аталып өтіп, бүгінде фестиваль деңгейіне дейін жетіп отыр. Ал, 2013 жылы жобаның ғаламтордағы «Нұрландыр» атты сайты жұмысын бастаған-ды. «Айналаңды нұрландыр!» жобасы өз кезегінде жанданып, оқу үдерісіндегі әлеуметтік- тәрбие жұмысы бойынша индикативті жоспарға енгізілді. Соның аясында әр факультетте, кафедраларда көптеген іс-шаралар ұйымдастырылып, студент жастар ізгілік жолында еңбек етуге, жақсылық жасауға, көмек қолын ұсынуға ұмтылды. Қоғамда болып жатқан саяси науқандарға белсене араласты. Осы жылы жоба бойынша студенттердің 50 пайызы белсенділік танытып, 5085 қыз-жігіттер жоба барысында игілікті істер жасауға өз үлестерін қосты. «Айналаңды нұрландыр!» жобасы жастар арасында кеңінен насихатталып, белсенділік танытқан студенттердің қатары өсті. Олар өз араларында жақсылық жасауға, бір-біріне көмектесуге, әртүрлі бағыттағы ұйымдастырылған қайырымдылық шараларға қатысуға құлшыныс білдірді. Жоба аясында көптеген байқаулар ұйымдастырылып, жақсылықты насихаттайтын танымдық эсселер жазылып, спорттық жарыстар ұйымдастырылды. «Айналаңды нұрландыр!» жобасы 2015 жылы үздіксіз еңбектің арқасында 8421 студент жастарды біріктіріп, 415 мерекелік шара өткізуге ұйтқы болған. Ғылыми жоба қорғап, жаңа идеялар ұсынған студенттер химия және химиялық технология факультетінің студенті Алина Темірғалиева, экономика және бизнес жоғары мектебінің 4 курс студенті Үміт Тасболатова, механика математика факультетінің магистранттары Тәуке Абдырахманов, Еркежан Шопанқызы және Балжан Тұрарбек, Әйгерім Жәдиева және Еламан Бекболатов марапатталды. Ең үздік эссе аталымы бойынша озық шыққан физика-техника факультетінің студенттері Айзат Абдолла, Асан Досболов, шығыстану факультетінің студенттері Ақдидар Сұлтанова, Аида Алимбекова марапатталды. Салтанатты шараның ұйымшылдықпен өтуіне университет проректоры Ш.Жаманбалаеваның, тәрбие жұмысы жөніндегі департамент директоры М.Ноғайбаеваның үлестері ерекше болды.
А.МОЛДАҒАЛИЕВА, Ш.ҒҰМАРОВА. Алматы қаласы
Басқа жаңалықтар
