Еліміздің білімді де белсенді жастарын қолдауға бағытталған бастамалардың бірі – «Bilim-orkenieti» ұлттық инновациялық ғылыми-зерттеу орталығы мен «Үздік студенттер академиясының» ұйымдастыруымен өтетін халықаралық «ТМД үздік студенті» байқауы талаптарына толық сай деп танылып, Ақмарал Еркінова халықаралық «ТМД-ның үздік студенті» байқауының жеңімпазы атанды.
Ақмарал Еркінова – Әл-Фараби атындағы ҚазҰУ механика-математика факультеті «Қолданбалы математика» мамандығының 3-курс студенті. Ақмарал өзін жан-жақты дамыған, көшбасшылық қабілеті жоғары студент ретінде танытып келеді. Ол қоғамдық жұмыстарға белсене араласып, жастар бастамаларын жүзеге асыруға үлес қосуда. Қазіргі таңда республикалық «Алматы дарыны» орталығының амбассадоры ретінде дарынды оқушылармен жұмыс істеп, олардың шығармашылық әлеуетін дамытуға атсалысып жүр. Сонымен қатар университеттегі қоғамдық іс-шараларды ұйымдастыру мен жүргізуде белсенділік танытуда.
Білім мен қоғамдық қызметтегі жетістіктері үшін Ақмарал Еркінова Алматы қаласының бұрынғы әкімі Ерболат Досаевтың, сондай-ақ Қазақстан Республикасының Президенті Қасым-Жомарт Тоқаевтың алғыс хаттарымен марапатталған.
Ақмарал Еркінованы 1-курстан белсенді студент екенін байқап, жетістіктеріне бағыт-бағдар беріп, кәсіби тұрғыда қолдау көрсетіп келе жатқан куратор-эдвайзері – Лида Әбсұлтанқызы.
Қоғамдық белсенділік пен ізденіске негізделген бағытта еңбек етіп жүрген көшбасшы жастар ұлттық дамудың басты тіректеріне айналуда.
Лида САҒЫМБАЕВА,
Математикалық және компьютерлік модельдеу
кафедрасы меңгерушісінің оқу-әдістемелік және тәрбие ісі жөніндегі орынбасары
