Білім сапасын арттырудағы кәсіби этиканың стратегиялық рөлі сараланды
Әл-Фараби атындағы ҚазҰУ-да «Академиялық басқару және білім сапасы: басшылар мен оқытушыларға арналған интенсив» атты стратегиялық сессия аясында «Оқытушы этикасы және қақтығыстарды басқару» тақырыбында сараптамалық-тәжірибелік бағыт өтті. Шараны Академиялық мәселелер жөніндегі департамент философия және саясаттану факультетінің Жалпы және қолданбалы психология кафедрасымен бірлесіп ұйымдастырды.
Сессия жұмысы оқытушының кәсіби этикасы, академиялық коммуникация мәдениеті және білім беру ортасындағы күрделі жағдайларды тиімді шешу мәселелеріне арналды. Оған университеттің оқытушы-профессорлар құрамы мен академиялық құрылым қызметкерлері қатысты.
Мамандар мұндай бағдарламалардың ерекше маңызға ие екенін атап өтті. Олардың айтуынша, университет аудиториясы қарқынды өзгеруде: цифрлық трансформация білім алушылардың жаңа когнитивтік және мінез-құлықтық ерекшеліктерін қалыптастырып, студенттердің оқу процесіне деген күтілімдерін өзгертті. Осындай жағдайда психологиялық тұрғыдан қолайлы әрі кәсіби тұрғыда ұйымдастырылған білім беру ортасын қалыптастыру қазіргі оқытушының негізгі міндеттерінің біріне айналуда.
Тәжірибелік алаң барысында қатысушылар университет өмірінде жиі кездесетін жағдайларды талқылады. Атап айтқанда академиялық адалдық мәселелері, кәсіби шекараларды сақтау, сондай-ақ цифрлық ортадағы коммуникацияның ерекшеліктері – мессенджерлер мен әлеуметтік желілердегі өзара әрекеттесу мәселелері қарастырылды.
Практикалық бөлім нақты кейстерді талдауға негізделді. Қатысушылар студент пен оқытушы арасындағы өзара әрекеттесу сценарийлерін қарастырып, шиеленістің туындау себептерін, олардың алдын алу алгоритмдерін талқылады. Мұндай формат күрделі жағдайларды жай ғана проблема емес, коммуникативтік мәдениетті талап ететін «басқарылатын процесс» ретінде қарастыруға мүмкіндік берді.
Қатысушылар аталған интенсивті курсты күнделікті оқытушылық тәжірибені қайта зерделеуге мүмкіндік беретін маңызды алаң ретінде бағалады. Шара студенттермен жұмыс істеудің қалыптасқан үлгілеріне жаңаша көзқараспен қарауға, жаңа педагогикалық және басқарушылық шешімдер қабылдауға жол ашты.
Әл-Фараби атындағы ҚазҰУ-дың Баспасөз қызметі
