ҚазҰУ-да шетелдік студент қыздарға арналған мерекелік кеш өтті

Халықаралық әйелдер күні қарсаңында әл-Фараби атындағы Қазақ ұлттық университетінде шетелдік білім алушы жастарға арналған мерекелік кеш өтті. Бұл шара жоғары оқу орнының ТДМ 5 (Гендерлік теңдік) қағидаттарына адалдығының және жастардың жан-жақты дамуы үшін инклюзивті орта қалыптастыруының жарқын дәлелі болды.

Мерекені тұрақты әлеуметтік даму жөніндегі проректор Бақытжан Омаров ашты. Университет ректоры Жансейіт Түймебаевтың атынан құттықтау сөзін жеткізе отырып, ол білім жолындағы бойжеткендердің табандылығы мен белсенділігін, олардың ғылыми және қоғамдық жобаларға қосқан үлесін жоғары бағалады.

Кеште жоғары оқу орнына дейінгі білім беру факультетінің студент қыздарына ерекше көңіл бөлінді. Олардың көбісі үшін бұл университет қабырғасындағы алғашқы үлкен мереке болып, әлеуметтік-мәдени бейімделудің маңызды кезеңіне айналды. Бойжеткендер кештен алған жағымды әсерлерімен бөлісті: жылылық пен қонақжайлылық атмосферасы оларға үлкен университет отбасының бір мүшесі ретінде сезінуге көмектесті. Мерекенің ең әсерлі сәті — әрбір бойжеткенге гүл шоғының сыйға тартылуы болды, бұл кешке көктемгі нәзіктік сыйлады.

Концерттік бағдарлама нағыз мәдениеттер калейдоскопына айналды. Музыкалық композициялар мен қойылымдар түрлі елдердің дәстүрлерімен таныстырып, мерекені мәдениетаралық диалог алаңына (ТДМ 17) айналдырды. Біздің факультеттің студенттері өз отандастары мен құрдастарының өнерін үлкен тебіреніспен тамашалап, мұндай іс-шаралар оқуға және Қазақстандағы белсенді өмірге шабыттандыратынын атап өтті.

Бұл кеш ҚазҰУ-дағы білім беру тек академиялық пәндермен шектелмейтінін, сонымен қатар өзара құрметті, таланттарды тануды және әрбір студенттің табысқа жету жолында қолдау көрсетуді қамтитынын тағы бір мәрте дәлелдеді.

Нусретиллаева И.К.,

 Жоғары оқу орнына дейінгі білім беру факультеті,

шетелдіктердің тілдік және жалпы білім беру дайындығы кафедрасының оқытушысы.