Әл-Фараби атындағы Қазақ ұлттық университетінің қара шаңырағында білімі мен білігін ұштастырып, оқу орнының дамуына өлшеусіз үлес қосып келе жатқан жандар аз емес. Солардың бірі – Академиялық мәселелер жөніндегі департаменттің Білім беру үдерісінің ұйымдастыру кеңсесінің бас маманы Гаухар Дәулетова.
Гаухар Жақсылыққызы 1968 жылы Шымкент қаласында дүниеге келген. Оның ҚазҰУ-мен байланысы 1986 жылы, биология факультетінің Өсімдіктер физиологиясы және биохимиясы кафедрасында зертханашы болып жұмыс істеуден басталды. Сол кезде география факультетінің студенті еді, отбасылық жағдайына байланысты оқу мен жұмысты қатар алып жүруі оның жастайынан жауапкершілігі жоғары, мақсатшыл және еңбекқор болғанын аңғартады. 1993 жылы «География» мамандығы бойынша оқуын тамамдап, география пәнінің оқытушысы деген мамандық алды.
Университетті бітіргеннен кейін Гаухар Жақсылыққызы инженер-метеоролог, кейіннен инженер-гидролог ретінде қызмет істеп, қоршаған ортаның жай-күйін бақылау саласында тәжірибе жинақтады. Алайда оның негізгі қызметі білім беру ісін ұйымдастыруға арналды: 1995-2001 жж. биология факультеті деканатының жоғары санатты әдіскері, 2001-02 жж. Халықаралық мамандықтар институты оқу бөлімінің бастығы. Ал 2006 жылдан бастап Әл-Фараби атындағы ҚазҰУ-дың Академиялық мәселелер жөніндегі департаментінде бас маман.
Гаухар Жақсылыққызы – жоғары білім беру жүйесінің нормативтік құжаттарын жетік меңгерген, ұйымдастырушылық қабілеті жоғары, талапшыл маман. Оның әр іске тиянақтылығы, оқытушылар құрамы және студенттермен тиімді қарым-қатынас орната білуі әріптестері арасында үлкен құрметке ие. Мінсіз қызметі үшін Гаухар Жақсылыққызы 2009 жылы Әл-Фараби атындағы ҚазҰУ-дың 75 жылдығына арналған мерекелік медалімен, ал 2024 жылы көпжылдық адал еңбегі мен кәсіби шеберлігі үшін «Ерен еңбегі үшін» медалімен марапатталды.
«Гаухар Жақсылыққызы – өз ісіне адал, кәсібилік пен адамгершіліктің жарқын үлгісі», – дейді әріптестері.
Гүлзат ТАБЫН
Басқа жаңалықтар
