Медиа мектеп жиыны
Медиа мектеп жиыны. Жақында Оңтүстік Қазақстан облысында әл-Фараби атындағы ҚазҰУ журналистика факультеті, баспасөз және электронды БАҚ кафедрасының ұйымдастыруымен мобильді медиа мектеп өтті. Шара Шымкент қаласы әкімінің қолдауымен ұйымдастырылып, БҰҰ Тұрақты даму саласындағы мақсаттар аясында Бүкіләлемдік баспасөз күніне арналды. Медиа мектептің ашылу салтанатында Алматыдағы ЮНЕСКО кластерлік бюросының өкілі Властимил Самек қатысушыларға сәттілік тілеп, өңірлердегі медиа-сауаттылық, интернет қауіпсіздік мәселелерін дамытуды үздіксіз жүргізу қажеттілігіне тоқталды. Профессор Гүлмира Сұлтанбаева шараның мақсатын таныстырып, республиканың әр өңірінен келген жас журналистерге, медиа мамандарына алғысын білдірді. Үш күнге созылған медиа мектеп жұмысы Шымкент – Шәуілдір – Арыстанбаб – Түркістан – Кентау – Шаян – Ақмешіт – Домалақ-Ана сияқты қасиетті аймақтарды қамтыды. Алғашқы сабақты «Мінбер» журналистерді қолдау қорының президенті, филология ғылымының кандидаты, доцент Есенгүл Кәпқызы «Қауымдық БАҚ және олардың міндеті» деген тақырыпта өткізді. Тележүргізуші, бірнеше тележобалардың авторы Асхат Садырбай ақпарат таратудың түрлі әдіс-тәсілдерін дамытудың жолдарын қарастыруды ұсынды. «Әлеуметтік желіде пікір алмасқаннан гөрі осындай медиа шараларда тәжірибе жинақтаған тиімді» деп өз пікірін білдірді. Маңызды әңгімені IT маманы, «Сұрақ-Жауап» сайтының редакторы, жоба авторы Ербол Серікбай «Ақпараттық сайттарға SEO жасау» тақырыбында өрбітті. Қатысушыларға «Ұлттық Интернет Ассоциациясының» президенті Серікқазы Кәкібаланов, блогер Бақытжан Бұхарбаев, белгілі радио-жүргізуші, журналист Мұхамедәлі Бұхарбаев, «Инвесторлар Альянсы» Қоғамдық бірлестігінің президенті Азаматхан Әміртаев, Шымкент қаласы әкімінің кеңесшісі-баспасөз хатшысы Нұрлыбек Жеңісбек, «Қазконтент» АҚ сарапшы маманы Сәкен Ділдахмет, әл-Фараби атындағы ҚазҰУ доценті Гүлнәр Мұқанова, Қырғызстандағы «Кабарлар» ақпарат агенттігінің редакторлары Айжан Бакытбекқызы, Нұрсұлу Нұркамилова, т.б. белгілі медиа мамандар шеберлік сағаттарын өткізді.
Әйгерім ӘЛІМЖАН, әл-Фараби атындағы ҚазҰУ-дың журналистика факультетінің аға оқытушысы
Басқа жаңалықтар
