География және табиғатты пайдалану факультеті Мичиган штатының мемлекеттік университетімен ынтымақтастықты кеңейтуде

2026 жылғы 4 қыркүйекте әл-Фараби атындағы Қазақ ұлттық университетінің география және табиғатты пайдалану факультетінде Мичиган штатының мемлекеттік университетінің (Michigan State University, MSU, АҚШ) профессорлары және өкілдерімен онлайн-кездесу өтті.

Кездесуге Мичиган штатының мемлекеттік университетінің өкілдері Yadu Pokhrel, Volodymyr Tarabara, Jiaguo Qi, Anne Stanton және Jennifer Wargo қатысты. Олардың ғылыми және кәсіби қызметі су ресурстарын зерттеу, Жерді қашықтан зондтау, геокеңістіктік технологиялар, экологиялық тұрақтылық және халықаралық ғылыми-білім беру ынтымақтастығын дамыту бағыттарымен байланысты.

Кездесудің негізгі мақсаты әл-Фараби атындағы ҚазҰУ-дың география және табиғатты пайдалану факультеті мен Мичиган штатының мемлекеттік университеті арасындағы білім беру және ғылыми-зерттеу салаларындағы ұзақ мерзімді ынтымақтастықтың мүмкіндіктерін талқылау болды.

Кездесу барысында тараптар ынтымақтастықтың бірқатар перспективалы бағыттарын талқылады, атап айтқанда:

- факультет қызметкерлерінің Мичиган штатының мемлекеттік университетінде «Болашақ» бағдарламасы, Erasmus+ бағдарламалары және басқа да халықаралық академиялық бағдарламалар аясында ғылыми тағылымдамадан өту және біліктілігін арттыру мүмкіндіктері;

- Мичиган штатының мемлекеттік университеті профессорларын факультет докторанттарының шетелдік ғылыми кеңесшілері ретінде ұсыну;

- халықаралық рецензияланатын басылымдарда бірлескен ғылыми мақалаларды дайындау және жариялау;

- су ресурстары, Жерді қашықтан зондтау және сабақтас бағыттар бойынша бірлескен халықаралық ғылыми-зерттеу жобаларын әзірлеу және жүзеге асыру;

- университеттер арасында қос дипломды білім беру бағдарламаларын әзірлеу перспективалары;

- факультет қызметкерлерінің халықаралық семинарлар мен воркшоптарға, соның ішінде «Water Diplomacy and Security» («Су дипломатиясы және қауіпсіздік») тақырыбындағы іс-шараларға қатысуы.

Кездесу кезінде профессор Jiaguo Qi таныстырған Asia Hub халықаралық бастамасына ерекше назар аударылды. Asia Hub бірлескен зерттеулерді, білім беру бастамаларын және халықаралық әріптестікті дамыту мақсатында түрлі елдердің университеттері мен ғылыми ұйымдарын біріктіреді. Желінің басым бағыттарының бірі – су-энергетикалық және азық-түлік жүйелерінің тұрақтылығы, табиғи ресурстарды ұтымды пайдалану және қазіргі заманғы экологиялық сын-қатерлерге бейімделу мәселелері.

Мичиган штатының мемлекеттік университетінің өкілдері факультет әріптестерін университеттің Жерді қашықтан зондтау және ГАЖ, ғылыми зерттеулерде ұшқышсыз ұшу аппараттарын қолдану, сондай-ақ су ресурстарын кешенді зерттеу салаларындағы ғылыми-зерттеу мүмкіндіктерімен таныстырды.

Кездесу қорытындысы бойынша тараптар ынтымақтастықты одан әрі дамытуға өзара мүдделі екендерін білдіріп, нақты бірлескен білім беру және ғылыми бастамаларды қалыптастыру бағытындағы жұмысты жалғастыруға уағдаласты.

Өткізілген кездесу география және табиғатты пайдалану факультетінің халықаралық академиялық байланыстарын кеңейтудегі маңызды қадам болып, факультет оқытушыларына, зерттеушілеріне, докторанттары мен жас ғалымдарына жаңа мүмкіндіктер ашады.

Мичиган штатының мемлекеттік университетінің пайдалы ресурстары:

MSU Asia Hub: https://asiahub.isp.msu.edu/asia-hub-meeting/

Remote Sensing & GIS Research and Services: https://rsgis.msu.edu/research-and-services/remote-sensing

Drones at Michigan State University: https://research.msu.edu/drones

MSU Water Alliance: https://water.msu.edu/about