Факультетіміздің студенттері HackAlem AI хакатонында!

Әл-Фараби атындағы ҚазҰУ-дың Ақпараттық технологиялар және жасанды интеллект факультетінің студенттері Астана қаласында өтіп жатқан HackAlem AI powered by OpenAI ауқымды AI-хакатонына қатысуда.

23 қыркүйекте басталған HackAlem AI – AI MONTH аясындағы алғашқы ірі іс-шаралардың бірі және Қазақстанда ұйымдастырылған ауқымды жасанды интеллект хакатондарының бірі.

Хакатон барысында үш адамға дейінгі командалар экономиканың 10 негізгі саласына арналған агенттік AI (Agentic AI) шешімдерін әзірлейді. Қатысушыларға қойылатын негізгі талаптардың бірі – Codex және OpenAI API мүмкіндіктерін пайдаланып, қысқа уақыт ішінде идеяны нақты жұмыс істейтін технологиялық шешімге айналдыру.

Хакатонның жүлделері мен ұсынылатын технологиялық ресурстарының жалпы көлемі $1,1 млн-ға дейін бағаланады. Оның ішінде $1 млн-ға дейін OpenAI технологиялық ресурстары, сондай-ақ OpenAI API ресурстары мен $100 мың көлеміндегі ақшалай жүлде қоры қарастырылған.

🏆 HackAlem AI жеңімпаздары AI & Digital Bridge 2026 сахнасында марапатталады.

Бұл хакатонның басты ерекшелігі – жасанды интеллектіні қолдану мүмкіндіктерін тек талқылап қана қоймай, нақты саланың міндетіне арналған жұмыс істейтін AI-шешімді шектеулі уақыт ішінде әзірлеу.

Факультетіміздің студенттері үшін бұл – білім мен дағдыларын тәжірибеде сынауға, заманауи AI технологияларымен жұмыс істеуге, командалық тәжірибе жинақтауға және өз идеяларын нақты өнімге айналдыруға үлкен мүмкіндік.

💡 10 бағыт. Agentic AI. Нақты міндеттерге – нақты технологиялық шешімдер.

Студенттерімізге сәттілік, тың идеялар және жоғары нәтижелер тілейміз!