География және табиғатты пайдалану факультетінде білім беру үдерісінің сапасы мәселелері бойынша әдістемелік семинар өтті

2026 жылғы 29 қыркүйекте әл-Фараби атындағы Қазақ ұлттық университетінің География және табиғатты пайдалану факультетінде білім беру үдерісін ұйымдастыру және оның сапасын қамтамасыз етудің өзекті мәселелеріне арналған әдістемелік семинар өтті.

Семинар спикерлері ретінде Мусинова Асель Ахметовна - Білім беру үдерісінің сапасын қамтамасыз ету басқармасының бастығы, Ботаева Асем Турисбековна - Академиялық аналитика және білім сапасын бақылау офисінің басшысы, сондай-ақ Круговых Илья Игоревич - Академиялық және цифрлық инновациялар офисінің басшысы сөз сөйледі.

Семинар жұмысына Академиялық аналитика және білім сапасын бақылау офисінің, Академиялық және цифрлық инновациялар офисінің, Ақпараттық технологиялар департаментінің өкілдері, оқу-әдістемелік жұмыс жөніндегі декан орынбасары, кафедра меңгерушілері, сондай-ақ Оқыту және білім беру сапасы жөніндегі академиялық комитеттің төрайымы мен мүшелері қатысты. Қатысушылардың осындай құрамы талқыланған мәселелерді кешенді қарастыруға және жаңартылған талаптар мен оларды факультет, кафедра және білім беру бағдарламалары деңгейінде іске асыру тәсілдері бойынша ортақ түсінік қалыптастыруға мүмкіндік берді.

Семинар барысында 2026-2027 оқу жылындағы білім беру үдерісін ұйымдастырудың өзекті мәселелері, университеттің ішкі нормативтік құжаттары, оқыту нәтижелерін бағалаудың заманауи тәсілдері, сондай-ақ Univer және Moodle ақпараттық жүйелерінде қорытынды бақылауды ұйымдастыруға қойылатын талаптар қарастырылды.

Білім беру үдерісін ұйымдастыру, білім сапасын қамтамасыз ету, академиялық адалдық, оқыту нәтижелерін бағалау және қорытынды бақылауды өткізу тәртібін реттейтін университеттің қолданыстағы және жаңартылып жатқан ішкі нормативтік құжаттарына ерекше назар аударылды.

Қатысушыларға университеттің жаңа құжаттары туралы да ақпарат берілді. Атап айтқанда, қазіргі уақытта Басқармада бекітілу сатысында тұрған «Білім алушылардың өтініштерін қарау қағидалары» таныстырылды. Аталған құжат білім алушылардың өтініштерімен жұмыс істеудің бірыңғай тәртібін қалыптастыруға бағытталған.

Сонымен қатар, бекітілу және жариялану сатысындағы «Академиялық гайд. Профессор-оқытушылар құрамына арналған нұсқаулық-әдістемелік хат» жаңа құжаты таныстырылды. Құжат профессор-оқытушылар құрамына білім беру үдерісін ұйымдастыру бойынша негізгі әдістемелік бағыттарды жүйелеуге арналған.
Семинардың маңызды бөлігі Univer ақпараттық жүйесінде тестілік емтиханды жобалау мәселелеріне арналды. Бағалау материалдарын әзірлеудің негізгі қағидаттары: тест тапсырмаларының оқыту нәтижелеріне сәйкестігі, мазмұнның репрезентативтілігі, сұрақтарды күрделілік деңгейлері бойынша бөлу, бағалауды стандарттау және объективтілігін қамтамасыз ету, сондай-ақ сұрақтар банкін жүйелі түрде жаңарту қажеттілігі қарастырылды.

Жаңартылған талаптардың енгізілуіне байланысты оқытушыларға бұрын әзірленген тест тапсырмалары банкін қайта қарап, өзектендіру қажеттілігі түсіндірілді. Бұрын қолданылған тест тапсырмалары төрт күрделілік деңгейін, пәннің оқыту нәтижелерін, Б. Блум таксономиясын және тест тапсырмаларының құрылымына қойылатын жаңа талаптарды ескере отырып, жаңа спецификацияға сәйкестендірілуі тиіс.

Семинардың жеке бөлімі Moodle қашықтан оқыту жүйесінде тестілеуді ұйымдастыру және өткізуге арналды. Қатысушыларға сұрақтар банкін қалыптастыру, тапсырмаларды санаттар мен күрделілік деңгейлері бойынша бөлу, тест параметрлерін баптау және әртүрлі сұрақ түрлерін пайдалану қағидалары түсіндірілді.

Спикерлер емтихан тапсырмаларының сапасына ерекше назар аударды: сұрақтардың нақты әрі бірмәнді құрастырылуы, жауап нұсқаларының мазмұндық тұрғыдан біркелкі болуы, шынайы дистракторларды пайдалану, жасырын нұсқаулардың болмауы, сондай-ақ формулалар, кестелер, графиктер мен суреттердің дұрыс берілуі атап өтілді.

Сонымен қатар, тест тапсырмаларын әзірлеуде алқалы тәсілдің маңыздылығы атап өтілді. Сұрақтарды емтихан банкіне енгізер алдында оларды әріптестермен талқылау, апробациядан өткізу, сапасын бағалау және қажет болған жағдайда түзету ұсынылды.

Өткізілген семинар білім беру үдерісін ұйымдастырудың бірыңғай тәсілдерін талқылауға, бағалау жүйесін жетілдіруге және емтихан материалдарының сапасын арттыруға арналған маңызды әдістемелік алаң болды. География және табиғатты пайдалану факультеті Білім беру үдерісінің сапасын қамтамасыз ету басқармасы тарапынан көрсетіліп отырған әдістемелік қолдаудың маңыздылығын атап өтіп, спикерлерге мазмұнды кездесу, практикалық ұсынымдар және кәсіби тәжірибе алмасу үшін алғыс білдіреді.

Іс-шара БҰҰ-ның Тұрақты даму мақсаттарының 4-мақсаты - «Сапалы білім беру» (ТДМ 4) қағидаттарын іске асыруға сәйкес келеді. Бағалау әдістерін жетілдіру, оқыту сапасын арттыру және заманауи академиялық әрі цифрлық құралдарды білім беру үдерісіне енгізу университеттегі тиімді білім беру ортасын дамытуға ықпал етеді.

Осындай әдістемелік кездесулер бірыңғай академиялық кеңістікті қалыптастыруға және әл-Фараби атындағы ҚазҰУ-да білім сапасы мәдениетін жүйелі түрде дамытуға ықпал етеді.