Табиғаттан үйренетін көшбасшылық: Германиядан келген профессор Дитмар Хилперттің дәрісі

Әл-Фараби атындағы Қазақ ұлттық университетінің Экономика және бизнес жоғары мектебінде Германиядан келген профессор, доктор Дитмар Хилперттің «Көшбасшылық: табиғаттан не үйрене аламыз?» («Leadership – what we can learn from Mother Nature») тақырыбындағы қонақ дәрісі өтті.

Дитмар Хилперт — стратегиялық менеджмент, инновациялар, баға саясаты және халықаралық маркетинг салаларындағы маман. Ол биология және экономика бағыттары бойынша білім алған. Осы пәнаралық даярлығы табиғаттағы заңдылықтарды басқару тәжірибесімен байланыстырып, көшбасшылық пен ұйымдардың дамуын ерекше қырынан қарастыруға мүмкіндік береді.

Профессор ұзақ жылдар бойы Германиядағы Ройтлинген университетінің ESB Business School мектебінде стратегиялық менеджмент пен халықаралық маркетингтен сабақ берген. Сонымен қатар Hoechst AG және Boehringer Ingelheim компанияларында жұмыс істеп, корпоративтік басқару мен маркетинг салаларында тәжірибе жинақтаған.

Дәріс көшбасшылықты табиғаттағы өзара әрекеттесу және бейімделу қағидалары арқылы қарастыруға арналды. Бұл тәсіл тиімді басқару, ұжымдық жұмыс және өзгерістерге бейімделу мәселелеріне жаңа көзқарас қалыптастыруға мүмкіндік береді.

Қонақ дәрісі университеттің халықаралық академиялық байланыстарын нығайтып, білім беру үдерісін пәнаралық тәсілдермен байытуға ықпал етті. Экономика және бизнес жоғары мектебі профессор Дитмар Хилпертке мазмұнды дәрісі мен тәжірибесімен бөліскені үшін алғыс білдіреді.