Шығыстану факультетінде докторанттардың диссертация жазу және қорғау: академиялық дайындығын жетілдіруге арналған ғылыми семинар өтті

2026 жылғы 13 қазанда Шығыстану факультетінде докторанттарға арналған «Диссертация жазу және қорғау: академиялық дайындық пен психологиялық ахуал» тақырыбында ғылыми семинар ұйымдастырылды. Іс-шараның негізгі мақсаты – диссертациялық зерттеуді сапалы әзірлеу, ғылыми жұмысты жазу мен рәсімдеуде жиі кездесетін қателердің алдын алу және докторанттарға пайдалы әдістемелік кеңестер беру.

Ғылыми семинарды Әл-Фараби атындағы Қазақ ұлттық университеті Шығыстану факультеті Түріктану және Шығыс елдерінің тарихы кафедрасының зерттеуші ғалым, филология ғылымдарының докторы Сүйерқұл Ботагөз Мырзабайқызы жүргізді.

Семинар барысында диссертациялық жұмысты әзірлеудің негізгі кезеңдері, зерттеу тақырыбының өзектілігін айқындау, ғылыми әдебиеттермен жүйелі жұмыс жүргізу, зерттеу әдістерін дұрыс таңдау және алынған нәтижелерді сауатты талдау мәселелері кеңінен қарастырылды. Сонымен қатар ғылыми жұмыстың құрылымын қалыптастыру, зерттеу мақсаты мен міндеттерінің өзара сабақтастығын сақтау, ғылыми жаңалықтарды негіздеу және дәлелді тұжырымдар жасауға ерекше назар аударылды.

Баяндамашы диссертация сапасына тікелей әсер ететін академиялық сауаттылық мәселелеріне де тоқталды. Атап айтқанда, ғылыми стиль нормаларын сақтау, терминологиялық дәлдікті қамтамасыз ету, орфографиялық және пунктуациялық қателерге жол бермеу, библиографиялық деректерді дұрыс рәсімдеу және пайдаланылған әдебиеттерге сілтемелерді талапқа сай көрсету қажеттігі атап өтілді. Сондай-ақ плагиаттың алдын алу, авторлық құқықты құрметтеу және ғылыми еңбектерді пайдаланудағы жауапкершілік мәселелері түсіндірілді.

Семинар мазмұнында ғылыми әдебиеттерді іріктеу мен талдаудың маңызына ерекше мән берілді. Зерттеушінің өз тақырыбына қатысты отандық және шетелдік ғылыми еңбектермен таныс болуы, заманауи зерттеулерді зерделеуі және дереккөздерді сыни тұрғыдан бағалай білуі диссертацияның ғылыми деңгейін арттыратын маңызды факторлар ретінде қарастырылды.

Сонымен бірге диссертацияны белгіленген мерзімде аяқтау, жұмыстың әр кезеңіне нақты жоспар құру, ғылыми жарияланымдарды уақтылы дайындау және ғылыми кеңесшілермен кәсіби әрі жүйелі байланыс орнату жөнінде ұсыныстар берілді. Бұл мәселелер докторанттың академиялық жауапкершілігін арттырып қана қоймай, ғылыми ізденісті тиімді ұйымдастыруға мүмкіндік беретіні атап өтілді.

Семинар тақырыбының маңызды бағыттарының бірі – диссертация жазу мен қорғау барысындағы психологиялық ахуал. Ғылыми жұмыстың күрделілігі, уақытты тиімді пайдалану қажеттігі және жоғары академиялық талаптар докторанттан табандылықты, жүйелілікті әрі ішкі жауапкершілікті талап етеді. Осы тұрғыдан алғанда, ғылыми жұмысты кезең-кезеңімен жоспарлау, туындаған қиындықтарды дер кезінде талқылау және ғылыми кеңесшілердің ұсыныстарын ескеру зерттеу үдерісін нәтижелі ұйымдастыруға ықпал етеді.

Мұндай ғылыми-әдістемелік кездесулер докторанттардың ғылыми-зерттеу дағдыларын жетілдіруге, академиялық мәдениетін қалыптастыруға және диссертацияны сапалы дайындау мен қорғауға деген дайындықтарын нығайтуға бағытталған. Сонымен қатар олар ғылыми ізденістегі жауапкершілік, академиялық адалдық және кәсіби даму құндылықтарын дәріптеуге мүмкіндік береді.

Ғылыми семинар докторанттардың академиялық әлеуетін арттыруға, ғылыми зерттеудің сапасын жетілдіруге және болашақ зерттеушілердің кәсіби қалыптасуына бағытталған маңызды іс-шаралардың бірі болды.