«Қаржылық сауаттылық: қаржылық тәуелсіздікке дейін» тақырыбында зияткерлік сабақ өтті

Ақшаны табу маңызды болса, оны дұрыс жұмсап, орнымен үнемдей білу де маңызды. Қаржылық сауаттылық – бүгінгі жастарға қажет өмірлік дағдылардың бірі. Өз қаражатын жоспарлай білген адам қаржылық қиындықтардың алдын алып, болашағына сенімді қадам жасай алады.

Осы мақсатта Жоғары оқу орнына дейінгі дайындық кафедрасының тыңдаушылары арасында «Қаржылық сауаттылық: қаржылық тәуелсіздікке дейін» тақырыбында зияткерлік сабақ өткізілді.

Сабақ барысында тыңдаушылар қаржыны дұрыс басқару, кіріс пен шығысты есептеу, ақша жинау және қаржылық мақсат қою туралы ой бөлісті. Түрлі сұрақтар мен қызықты тапсырмалар арқылы өз білімдерін сынап, күнделікті өмірде кездесетін қаржылық жағдайларды талқылады.

Шараның ерекше тұстарының бірі – әр елдің қаржылық мәдениеті туралы пікір алмасу болды. Қытай мен Моңғолиядан келген тыңдаушылар өз елдеріндегі ақша жұмсау дағдылары, үнемдеу, қаражат жинау және отбасылық бюджетті жоспарлау туралы әңгімеледі. Олар өз тәжірибелерімен бөлісіп, елдеріндегі ұқсастықтар мен ерекшеліктерді салыстырды. Бұл әңгіме қатысушыларға бір-бірінің өмір салтын жақынырақ танып, қаржыға қатысты көзқарастарын кеңейтуге мүмкіндік берді.

Сабақтың келесі кезеңінде «Қажеттілік пе, әлде қалау ма?» тапсырмасы орындалды. Тыңдаушылар күнделікті өмірде кездесетін шығындарды талдап, ненің қажет, ненің жай ғана қалау екенін ажыратуға тырысты. Бұл тапсырма ақшаны жұмсағанда асығыс шешім қабылдамай, алдымен қажеттіліктерді ескерудің маңызын көрсетті.

Ал «Жеке бюджетімді жоспарлаймын» тапсырмасында қатысушылар шартты айлық табысты бөліп, азық-түлікке, жолақыға, оқу құралдарына және басқа да қажеттіліктерге жұмсалатын қаражатты есептеді. Сонымен қатар ақшаның бір бөлігін жинаққа қалдыру жолдарын қарастырды.

Зияткерлік сабақтың қызықты кезеңдерінің бірі дебат форматында өтті. Қатысушылар екі топқа бөлініп, «Қаржылық тәуелсіздікке жетуде үнемдеу маңызды ма, әлде табысты арттыру маңызды ма?» деген тақырыпта пікірталас жүргізді. Бір топ ақшаны үнемдеп, дұрыс жоспарлаудың маңызын айтса, екінші топ табыс көздерін көбейту қажеттігін дәлелдеуге тырысты. Әр қатысушы өз ойын мысалдармен негіздеп, қарсы тараптың пікіріне жауап берді. Пікірталас барысында қаржылық тәуелсіздікке жету үшін үнемдеу мен табысты арттырудың екеуі де маңызды екені талқыланды.

Бұдан бөлек, тыңдаушылар «Қаржылық білім бәйгесі» кезеңінде қаржыға қатысты сұрақтарға жауап беріп, «Қаржылық жағдайдан шығу жолы» тапсырмасында түрлі өмірлік жағдаяттарды шешудің жолдарын ұсынды. Олар күтпеген шығындарға дайын болу, күмәнді қаржылық ұсыныстардан сақтану және жеке қаражатқа жауапкершілікпен қарау туралы ойларын ортаға салды.

Зияткерлік сабақ тыңдаушыларға қаржы туралы жаңа мағлұмат беріп қана қоймай, өзара пікір алмасуға, бір-бірінің тәжірибесінен үйренуге және өз көзқарастарын дәлелдеуге мүмкіндік берді.

Қаржылық тәуелсіздік үлкен табыстан ғана басталмайды. Ол – қолдағы қаражатты бағалаудан, ақшаны орнымен жұмсаудан және әрбір шешімді ойланып қабылдаудан басталады. Бүгінгі сауатты қаржылық қадам – ертеңгі сенімді болашақтың негізі.