Жаһандық дипломатия және тұрақты даму: ҚазҰУ-дың халықаралық қатынастар саласының мамандары ЮНЕСКО өкілдерімен бірге БҰҰ күнін атап өтті

2026 жылғы 19 қазанда әл-Фараби атындағы Қазақ ұлттық университетінің Халықаралық қатынастар факультетінде Біріккен Ұлттар Ұйымының күніне арналған халықаралық дөңгелек үстел өтті.

Іс-шараны Халықаралық қатынастар факультетінің деканы Жұлдыз Талғатқызы Сайрамбаева ашты. Өз сөзінде ол халықаралық ынтымақтастықты нығайтудағы, бейбітшілік пен қауіпсіздікті сақтаудағы Біріккен Ұлттар Ұйымының маңызын атап өтті. Сонымен қатар халықаралық қатынастар саласында заманауи талаптарға сай мамандар даярлаудың маңыздылығына тоқталды.

Іс-шараның негізгі спикері әрі құрметті қонағы ретінде онлайн форматта ЮНЕСКО-ның Алматыдағы Өңірлік кеңсесінің директоры, сондай-ақ Қазақстан, Қырғызстан, Тәжікстан және Түрікменстандағы ЮНЕСКО өкілі Амир Пирич мырза қатысты. Ол БҰҰ аясындағы халықаралық ынтымақтастықтың маңыздылығын атап өтіп, білім беру, ғылым, мәдениет және алуан түрлілікті құрметтеу арқылы бейбітшілікті нығайтудағы ЮНЕСКО-ның негізгі рөліне тоқталды. Ол студенттерді сыни ойлау қабілетін, диалог жүргізу дағдыларын және халықаралық қоғамдастықтың болашағына деген жауапкершілікті дамытуға шақырды. Сондай-ақ Орталық Азиядағы өңірлік ынтымақтастықтың маңыздылығын ерекше атап өтті. Сөзінің соңында бейбітшілік өзара түсіністіктен басталатынын және неғұрлым әділетті, инклюзивті әрі тұрақты болашақты қалыптастыруда жас ұрпақтың маңызды рөл атқаратынын жеткізді.

Құттықтау сөзін ЮНЕСКО-ның Алматыдағы Өңірлік кеңсесі директорының көмекшісі Гаухар Балгарина ханым сөйледі. Әл-Фараби атындағы ҚазҰУ-дың Халықаралық қатынастар факультетінің түлегі ретінде ол өзінің кәсіби тәжірибесімен бөлісіп, БҰҰ мен ЮНЕСКО-ның мақсаттары мен міндеттерін іске асырудағы халықаралық ынтымақтастықтың маңыздылығын атап өтті.
 

Дөңгелек үстел аясында Біріккен Ұлттар Ұйымының негізгі қызмет бағыттары мен оның Қазақстан үшін маңызы туралы презентация ұсынылды. Қатысушылар еліміздің халықаралық ынтымақтастықты дамыту және БҰҰ күн тәртібін ілгерілету бағытындағы негізгі жетістіктері мен бастамаларын да талқылады.

Іс-шара барысында БҰҰ-ның Тұрақты даму мақсаттарына (ТДМ) ерекше назар аударылды. Атап айтқанда, 4-мақсат – Сапалы білім, 16-мақсат – Бейбітшілік, әділдік және тиімді институттар, сондай-ақ 17-мақсат – Тұрақты даму жолындағы әріптестік мәселелері қарастырылды.

Іс-шараның интерактивті бөлімі ерекше қызығушылық тудырды. Бағдарлама аясында «БҰҰ туралы не білесің?» атты викторина өткізіліп, Madcon тобының «Don’t Worry» әніне қойылған жарқын би нөмірі ұсынылды. Бұл мерекелік шараға ерекше көңіл күй сыйлады.

Дөңгелек үстел студенттердің БҰҰ-ның бейбітшілік пен қауіпсіздікті қамтамасыз етудегі, халықаралық ынтымақтастықты дамытудағы, әсіресе білім беру, ғылым және мәдениет салаларындағы рөлі туралы түсінігін кеңейтуге мүмкіндік берді. Сонымен қатар БҰҰ-ның ортақ жаһандық сын-қатерлерді талқылау және бірлескен шешімдер қабылдау үшін бірегей халықаралық алаң ретіндегі маңызы атап өтілді.

Дөңгелек үстелді қорытындылай келе, БҰҰ туралы ақпараттық қолдау жөніндегі академиялық аймақтық ресурстық орталықтың директоры Л. Ф. Деловарова қонақтар мен қатысушыларға алғысын білдіріп, студенттер арасында «18-ші Тұрақты даму мақсаты қандай болар еді?» атты шығармашылық байқаудың басталғанын жариялады.

Дөңгелек үстел әл-Фараби атындағы Қазақ ұлттық университетінің Халықаралық қатынастар факультеті жанындағы БҰҰ туралы ақпараттық қолдау жөніндегі академиялық аймақтық ресурстық орталықтың қолдауымен ұйымдастырылды. Іс-шараның жауапты ұйымдастырушысы – Л. Ф. Деловарова.