Құрметті Әл-Фараби атындағы Қазақ ұлттық университетінің оқытушы-профессорлары, қызметкерлері мен білім алушы жастар!
Сіздерді Қазақстан Республикасы күнімен шын жүректен құттықтаймын!
25 қазан – еліміздің егемендік жолындағы тарихи қадамын айғақтайтын, мемлекеттілігіміздің іргетасы қаланған басты мейрам.
Мемлекет басшысы Қасым-Жомарт Кемелұлы Тоқаев: «Бұл – бүкіл халқымыз үшін мән-мағынасы ерекше және қастерлі мейрам! 25 қазанда ақжолтай құжат – Қазақстанның Егемендігі туралы декларация қабылданды. Дәл сол күні ұлт жылнамасының жаңа кезеңі басталды. Көп ұзамай өз алдына дербес ел атандық. Тарихи әділдік орнап, қасиетті қазақ жеріне Тәуелсіздіктің алтын қазығы қағылды. Сондықтан бұл күнді Ұлы даладағы мемлекеттілік дәстүрі қайта жаңғырған күн деп айтсақ, артық емес», – деп атап өтті.
Президентіміз бұл мейрамның жаңа мазмұнда атап өтілуіне ерекше мән беріп, оның негізгі мақсаты – азаматтардың құқықтары мен бостандықтарын қорғау, бірлікті сақтау және «Адал азамат» идеясы арқылы Әділетті Қазақстанды құру екенін баса айтып келеді. Мемлекет басшысының бастамасымен бұл күні күллі ел болып көк байрағымызды ұлықтау мақсатында барлық өңірде Мемлекеттік Туды көтерудің салтанатты рәсімін өткізу игі дәстүрге айналды. Бұл – халқымыздың рухын көтеріп, елдігімізді паш ететін айрықша сәт.
Бүгінгі таңда еліміз салиқалы саясаттың арқасында сапалы жаңа кезеңге қадам басты. Бұл жолдың басты темірқазығы – қоғамдағы «Заң мен тәртіп» қағидаты және әрбір азаматтың санасында жаңғырған «Адал азамат» концепциясы. Әділетті қоғамда адал еңбек, білім мен ғылым, жоғары мәдениет пен жауапкершілік әрдайым басты орында тұруға міндетті.
Қадірлі университет қауымы!
Әл-Фараби атындағы Қазақ ұлттық университеті осы стратегиялық міндеттерді жүзеге асыруда әрдайым көшбасшы болуға тиіс. Біз заманауи ғылымды дамытып, жасанды интеллект дәуіріне лайықты білікті кадрлар даярлау арқылы Отанымыздың өркендеуіне сүбелі үлес қосып келеміз. Бұл – мемлекетіміздің сенімді тірегі болуға ұмтылған біздің ортақ парызымыз.
Алдымызда елдігімізді нығайту, білім мен ғылымды биік белеске көтеру жолында атқарар ауқымды міндеттер тұр. Осы игі істерде бірлік, татулық және отаншылдық сезімі әрдайым басты тірегіміз болғай!
Баршаңызға мықты денсаулық, отбасыларыңызға амандық, еңбектеріңізге толағай табыс тілеймін!
Еліміздің іргесі берік, тәуелсіздігі баянды, болашағымыз жарқын болсын!
Құрметпен,
Әл-Фараби атындағы ҚазҰУ Басқарма
Төрағасы – Ректор
Жансейіт Түймебаев
Басқа жаңалықтар
