Докторанттар LeapSpace платформасының ғылыми зерттеулерге арналған мүмкіндіктерімен танысты

Әл-Фараби атындағы Қазақ ұлттық университетінің Экономика және бизнес жоғары мектебінде LeapSpace платформасын ғылыми-зерттеу жұмысында қолдануға арналған кездесу өтті. Кездесуді деканның ғылыми-инновациялық қызмет және халықаралық байланыстар жөніндегі орынбасары Шыңғыс Нұрғазы факультет докторанттарына өткізді.

LeapSpace — Elsevier әзірлеген, жасанды интеллектке негізделген зерттеу платформасы. Ол ғылыми әдебиеттерді іздеу мен талдауға, зерттеу идеяларын дамытуға және бұрынғы зерттеулерде жеткілікті қарастырылмаған мәселелерді анықтауға көмектеседі. Платформа ғылыми жарияланымдарға сүйеніп, алынған жауаптарды тексеру үшін бастапқы дереккөздерге жүгінуге мүмкіндік береді.

Кездесу барысында LeapSpace платформасын докторлық диссертациялар мен ғылыми мақалалар дайындауда қолдану мүмкіндіктері қарастырылды. Ғылыми әдебиеттермен жұмыс істеу, зерттеу сұрақтарын нақтылау және зерттеудің теориялық негізін қалыптастыру үшін цифрлық құралдарды пайдалану мәселелеріне назар аударылды.

Мұндай құралдарды меңгеру докторанттардың зерттеу дағдыларын жетілдіруге және ғылыми жұмысын тиімді ұйымдастыруға ықпал етеді. Сонымен қатар жасанды интеллектті қолдану алынған ақпаратты сыни тұрғыдан бағалауды, бастапқы дереккөздерді тексеруді және академиялық адалдық қағидаттарын сақтауды талап етеді.