ҚазҰУ студенттері Ахмет Байтұрсынұлының музей-үйіне барды

29 қазанда әл-Фараби атындағы Қазақ ұлттық университеті журналистика факультетінің «Баспагерлік іс» мамандығының 4-курс студенттері «Алаш басылымдары» пәні аясында көрнекті ғалым-лингвист, ақын, публицист әрі «Алаш» қозғалысының жетекшілерінің бірі Ахмет Байтұрсынұлының музей-үйіне барды.

Сабақтың мақсаты – студенттерді А. Байтұрсынұлының өмірі мен шығармашылық жолымен, ХХ ғасырдың басындағы қазақ мерзімді баспасөзінің тарихымен және оның ұлттық сана-сезімді қалыптастырудағы рөлімен таныстыру.

Музей қызметкерлері Ахмет Байтұрсынұлы өмірбаянының негізгі кезеңдері туралы әңгімелеп, оның ғылыми және әдеби мұрасына арналған экспозицияны таныстырды. Әсіресе, 1913–1918 жылдары өзі басқарған әрі Алаш зиялыларының басты мінберіне айналған «Қазақ» газетіне ерекше назар аударылды. Студенттер «Маса» өлеңдер жинағына, «Оқу құралы» оқулығына және тіл біліміне қатысты еңбектеріне арналған материалдармен танысып, аталған басылымдардың қазақ тілінің, білім беру саласының және қоғамдық ойдың дамуына ықпалын талқылады.

Студенттердің айтуынша, түпнұсқа жәдігерлер мен архивтік материалдармен танысу пән мазмұнын тереңірек түсінуге және Алаш басылымдарының тарихи дереккөз ретіндегі маңызын бағалауға мүмкіндік берді.

Мұндай көшпелі сабақтар теориялық білімді мәдени мұрамен практикалық тұрғыда танысумен ұштастырып, студенттердің қазақ руханиятының тарихы мен дәстүрлеріне деген құрметін арттырады.

Аргынбаева М.Х., фил.ғ.к., Баспагерлік-редакторлық 
және дизайнерлік өнер кафедрасының 
ассистент-профессоры