ҚазҰУ-да Президент Жолдауы аясында цифрландыру және жасанды интеллект мәселелері талқыланды

2026 жылғы 6 қарашада әл-Фараби атындағы Қазақ ұлттық университетінің Халықаралық қатынастар факультетінде «Президент Жолдауы аясында цифрландыру және жасанды интеллект – Қазақстан дамуының жаңа мүмкіндіктері» тақырыбында студенттік пікірталас өтті.

Іс-шараның негізгі мақсаты – Қазақстан Республикасы Президенті Қасым-Жомарт Тоқаевтың 2026 жылғы 28 қазандағы «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауында айқындалған басым бағыттарды талқылау, студенттердің цифрлық технологиялар мен жасанды интеллекттің қоғам дамуына ықпалы туралы түсінігін кеңейту және олардың сыни ойлау қабілетін дамыту.

Пікірталас барысында қатысушылар еліміздегі цифрлық трансформацияның қазіргі жағдайы мен болашағына, жасанды интеллект технологияларын экономиканың түрлі салаларына енгізу мүмкіндіктеріне, сондай-ақ инновациялық дамудың жаңа бағыттарына назар аударды.

Студенттер жасанды интеллекттің мемлекеттік басқару жүйесін жетілдірудегі, білім беру мен ғылымды дамытудағы, еңбек өнімділігін арттырудағы және Қазақстанның халықаралық бәсекеге қабілеттілігін нығайтудағы рөлі туралы өз пікірлерін ортаға салды.

 

Сонымен қатар, пікірталас аясында цифрландыру үдерісінің халықаралық қатынастарға ықпалы, цифрлық дипломатияның даму перспективалары, ақпараттық қауіпсіздік, дербес деректерді қорғау және жасанды интеллектті пайдаланудың этикалық мәселелері қарастырылды.

Қатысушылар технологиялық жаңғырудың жаңа мүмкіндіктерімен қатар, оның қоғам мен еңбек нарығына тигізетін ықтимал әсерлерін де талқылады. Әсіресе, болашақ мамандардың цифрлық сауаттылығын арттыру, заманауи технологияларды тиімді пайдалану және өзгермелі еңбек нарығына бейімделу қажеттілігіне ерекше мән берілді.

Студенттік пікірталас еркін пікір алмасу форматында өтіп, қатысушылар өз көзқарастарын білдіріп, ұсыныстарын ортаға салуға мүмкіндік алды.

Іс-шара қорытындысында цифрландыру мен жасанды интеллектті дамыту Қазақстанның тұрақты экономикалық өсуін қамтамасыз етудің, мемлекеттік басқарудың тиімділігін арттырудың және елдің халықаралық аренадағы орнын нығайтудың маңызды факторларының бірі екені атап өтілді.

Мұндай іс-шаралар жастардың елдегі қоғамдық-саяси үдерістерге қызығушылығын арттыруға, Президент Жолдауында белгіленген стратегиялық міндеттердің маңызын түсінуге және студенттердің аналитикалық ойлау дағдыларын қалыптастыруға ықпал етеді.