ТДМ № 3, 5: ҚазҰУ-да ЮНИСЕФ жастар кеңістігі өз жұмысын бастады

Әл-Фараби атындағы Қазақ ұлттық университетінің Farabi Hub кеңістігінде Алматы қаласының әкімдігімен ынтымақтастық аясында ЮНИСЕФ Жастар хабының салтанатты ашылу рәсімі өтті. Жаңа интерактивті кеңістік жастар бастамаларын қолдауға, олардың әлеуетін дамытуға және әлеуметтік маңызы бар жобаларды жүзеге асыруға бағытталған. Хаб жастарға білім алуға, волонтерлік қызметпен айналысуға, тәжірибе алмасуға және қоғамдағы өзекті мәселелерді шешуге белсенді қатысуға мүмкіндік береді.

Хаб қызметінің негізгі бағыттарына психикалық әл-ауқат, зорлық-зомбылық пен буллингтің алдын алу, цифрлық қауіпсіздік, салауатты өмір салты және экологиялық мәдениет жатады. Тең мүмкіндіктерді ілгерілетуге, инклюзивті мәдениетті дамытуға және әрбір жас адамның қоғамдық өмірге толыққанды қатысуына жағдай жасауға ерекше мән беріледі. Кеңістік үш функционалдық аймақтан тұрады: білім беру аймағы, цифрлық контент жасау студиясы және қарым-қатынас пен кәсіби байланыстар орнатуға арналған аймақ.

Ашылу рәсімі барысында университет, мемлекеттік органдар, ЮНИСЕФ және қоғамдық ұйымдардың өкілдері жастардың әлеуетін дамыту, психологиялық әл-ауқатты нығайту, қауіпсіз әрі инклюзивті орта қалыптастыру және әлеуметтік бастамаларды қолдаудың маңыздылығын атап өтті. Психологиялық қиындықтардың алдын алу, тұлғалық дамуға қолайлы жағдай жасау және жастардың қолдау алу мүмкіндіктері туралы хабардарлығын арттыру мәселелеріне ерекше назар аударылды.

ЮНИСЕФ Жастар хабының ашылуы студенттердің өзін-өзі жүзеге асыру мүмкіндіктерін кеңейтуге, әлеуметтік жауапкершілікті дамытуға және өзара сыйластық мәдениетін нығайтуға ықпал етеді. Жаңа кеңістіктің қызмет бағыттары ҚазҰУ Психологиялық қызметінің психологиялық қиындықтардың алдын алу, психикалық денсаулықты қолдау және қауіпсіз университеттік орта қалыптастыру жөніндегі басымдықтарымен үндеседі. Хаб студенттік бастамаларды дамытуға, инклюзивті құндылықтарды ілгерілетуге және жастар мен қоғамдық ұйымдар арасындағы өзара байланысты нығайтуға арналған қосымша алаңға айналады.