ҚазҰУ ғалымы Новосибирск қаласында өткен кері есептер бойынша халықаралық конференцияға қатысты — ҚазҰУ

ҚазҰУ ғалымы Новосибирск қаласында өткен кері есептер бойынша халықаралық конференцияға қатысты

19 қараша 2026
ҚазҰУ ғалымы Новосибирск қаласында өткен кері есептер бойынша халықаралық конференцияға қатысты

2026 жылғы 16–18 қараша аралығында Ресей Федерациясының Новосибирск Академиялық қалашығында Ресей Ғылым академиясының корреспондент-мүшесі В.В. Васиннің 85 жылдығына арналған «Кері есептердің қазіргі заманғы мәселелері» атты V халықаралық ғылыми конференция өтті.

Конференция жұмысына әл-Фараби атындағы Қазақ ұлттық университеті механика-математика факультетінің Есептеу ғылымдары және статистика кафедрасының меңгерушісі, қауымдастырылған профессор С.Е. Касенов қатысты.

Халықаралық ғылыми жиын қолданбалы математика, есептеу әдістері, математикалық модельдеу және жасанды интеллект салаларындағы жетекші ғалымдар мен мамандардың басын қосты. Конференцияда кері және қисынсыз қойылған есептерді шешудің заманауи әдістері, сандық алгоритмдердің орнықтылығы және математикалық әдістерді ғылымның әртүрлі салаларында қолдану мәселелері қарастырылды.

16 қарашада конференцияның пленарлық отырысында «Регуляризацияны қолдану арқылы ісіктің өсуінің математикалық моделінің параметрлерін идентификациялау» тақырыбында бірлескен ғылыми баяндама ұсынылды (авторлары: М.А. Бектемесов, С.И. Кабанихин, Ж.М. Бектемесов, С.Е. Касенов).

Ғылыми зерттеу ісіктің өсуін сипаттайтын математикалық модельдердің белгісіз параметрлерін регуляризация әдістері арқылы қалпына келтіруге арналған. Зерттеу нәтижелері математикалық биологияны, есептеу медицинасын және биологиялық процестерді талдаудың заманауи технологияларын дамыту үшін маңызды.

Конференция барысында С.И. Кабанихин, Д.В. Лукьяненко, О.И. Криворотько, Г.А. Бочаров, Н.В. Трусов және С.В. Стрижак сынды жетекші ғалымдардың ғылыми баяндамалары ерекше қызығушылық тудырды. Баяндамаларда математикалық иммунология, эпидемиологиялық процестерді модельдеу, кері есептерді нейрондық желілер арқылы шешу, регуляризация әдістері және деректерді вариациялық ассимиляциялау мәселелері қамтылды.

Халықаралық конференцияға қатысу ғылыми тәжірибе алмасуға, кәсіби байланыстарды кеңейтуге және Ресейдің жетекші ғылыми орталықтарымен ынтымақтастықтың перспективалық бағыттарын айқындауға мүмкіндік берді.

Халықаралық ғылыми ынтымақтастықты дамыту әл-Фараби атындағы ҚазҰУ Есептеу ғылымдары және статистика кафедрасының басым бағыттарының бірі болып табылады және университеттің ғылыми-зерттеу әлеуетін нығайтуға ықпал етеді.

Іс-шара БҰҰ-ның келесі Тұрақты даму мақсаттарына (ТДМ) сәйкес келеді:

  • ТДМ 3 — Жақсы денсаулық және әл-ауқат: биологиялық процестерді зерттеу мен ісіктің өсуін модельдеудің математикалық әдістерін дамыту.

  • ТДМ 4 — Сапалы білім беру: озық ғылыми біліммен алмасу және заманауи зерттеу әдістерін білім беру процесіне енгізу.

  • ТДМ 9 — Индустрияландыру, инновациялар және инфрақұрылым: инновациялық есептеу әдістерін, математикалық модельдеуді және жасанды интеллект технологияларын дамыту.

  • ТДМ 17 — Тұрақты даму мақсаттары үшін әріптестік: халықаралық ғылыми ынтымақтастықты нығайту және Қазақстан мен Ресейдің ғылыми-зерттеу ұйымдары арасындағы өзара байланысты кеңейту.