Жуырда механика-математика факультетінің академик Ө. А. Жолдасбеков атындағы үлкен залында ҚР Қазақстан ұстаздары қоғамының салтанатты марапаттауы өтті.
Елбасы Н. Ә. Назарбаевтың 5 институционалдық реформасын жүзеге асырудың 100 нақты қадамын ұлт болашағын тәрбиелеп, оқытып жатқан Қазақстан педагогтарына кеңінен насихат ету мақсатында жұмыс істеп жатқан Қазақстан ұстаздары қоғамы ҚазҰУ-дың механика-математика факультеті оқытушы-профессорлары мен студенттерінің қолдауымен республикамыздың әр өңірінде белсенді еңбек етіп жатқан қайраткер ұстаздарымызды, қоғамның белсенді мүшелерінің басын қосып, марапаттады. Қадірлі ұстаздарды ҚазҰУ-дың механика-математика факультетінің деканы, профессор Мақтағали Бектемесов, Зияткерлік технологиялар институтының Бас директоры, профессор Алмас Өскенбаев, Қазақстанның Еңбек сіңірген қайраткері, ҰҒА Құрметті академигі, профессор, ҚР Журналистер Одағының мүшесі Әбдіжапар Сапарбаев, Қазақстан ұстаздары қоғамының Бас хатшысы, тәлімгері, ҚР Журналистер Одағының мүшесі, республикалық «Игілік» журналының Бас редакторы Меруерт Әйтенова құттықтап, жоғары жетістіктер тіледі.
Жоғары марапатқа ие болған ұстаздар қатарында жоғары оқу орындарында үздіксіз білім беріп келе жатқан белгілі ғалымдарымыз бен оқытушыларымыз – ҚазҰУ-дың механика-математика факультетінің деканы, физика-математика ғылымдарының докторы, профессор Мақтағали Бектемесов, механика-математика факультетінің профессоры Айдархан Қалтаев, механика-математика факультеті дифференциялдық теңдеулер мен басқару теориясы кафедрасының меңгерушісі Салтанбек Мұхамбетжанов, іргелі математика кафедрасының меңгерушісі, физика-математика ғылымдарының докторы, профессор Мирболат Сиховқа «Қазақстан ғалымы» медалі табысталып, үлкен құрметке ие болды.
Сондай-ақ «Тәлімгер» медалімен Қазақстанның Еңбек сіңірген қайраткері, ҰҒА Құрметті академигі Әбдіжапар Сапарбаев, «Қазақстан ғалымы» медалімен Абай атындағы ҚазҰПУ Баспа бөлімінің басшысы Мырзахан Ахмет және Ж.С. Асфендияров атындағы ҚазҰМУ-дың аға оқытушысы, доцент Мұхтар Қанқожа марапатталды. Сонымен қатар аталған медалдармен
Батыс Қазақстан облысында, Қызылорда қаласы мен облысында, Жамбыл облысында ұзақ жылдар шәкірт тәрбиелеп, өз мамандығының нағыз майталманы болған ұстаз тұлғалар марапатталса, өткізілетін олимпиадаларға қатысып, қабілетімен көзге түскен білім алушыларды көтермелеу мақсатында «Оқудағы үздік жетістіктері үшін» төсбелгісі мен ақшалай атаулы стипендиясы Жадыра Түсіпбековаға берілді.
Республикамыздың түкпір-түкпірінен келген аяулы мектеп ұстаздарына арнап механика-математика факультетінің талантты студенттері әннен шашу шашты.
А.Т. ТҰРҒАНБАЕВА,
к.п.н., доцент;
С.А. ДАУЛЕТОВА
аға куратор
Басқа жаңалықтар
