БИОЛОГТАРДЫҢ ҚЫЗЫҚҚА ТОЛЫ АПТАСЫ

Биология және биотехнология факультетінің 14-19 қараша аралығындағы күндері қызыққа толы болды. Халық қаһарманы, жазушы Бауыржан Момышұлы: «Ұлттық рух пен ұлттық патриотизм – бұл ұлттың ішіндегі жеке адамның асыл белгісі мен қасиеті» деп бекер айтпаса керек. Осы – асыл қасиеттерді өшірмей, үнемі жандандырып отыру біздің міндетіміз. Жастар бойындағы жалынды патриотизмді қалыптастыру барысында  факультетімізде түрлі ұйымдар жұмыс атқарады. Ұйымдардағы белсенді жастардың бір апта ішінде өткізген іс - шараларына тоқталып өтсек:

Студенттердің ғылыми қоғамы ұйымдастырған «Bioleader-2016» интеллектуалды сайысы. Іс-шараның мақсаты 1 курс студенттері арасындағы білімді, тапқыр және озатты анықтау. Сайыс жүлдегерлері: Исимова Меруерт (1 орын) атанып, ақшалай сыйлықпен марапатталды. Бөрібек Дана (2 орын) кинотеатрға, Болат Әсем (3 орын) театрға жолдама алды.

«Сұңқар» студенттер және магистранттар кәсіподақ бюросының ұйымдастырған «Ғажайып үштік» топаралық сайысы. Сайыстың мақсаты: әр топтағы староста, ұйымдастырушы, профоргтан тұратын үштіктің топтар арасындағы бірлігі мен достығын арттыру. Жеңіске жеткен топ: «Жалын» тобы Медеу мұз айдынына жолдама алды.

Маслихат ұйымы ұйымдастырған «Delicious» аспаздық сайысы. Бұл сайыстың ерекшелігі барлық факультет аралық дәмді ас дайындау шеберлігінен жарысу еді. Жарысқа қатысқан бір топтағы екі қатысушы тамаша өнерімен таң қалдырса, қалған екеуі ас дайындаудағы бар өнерін ортаға салады. География және табиғатты пайдалану факультетінен құралған «Нирвана» командасы сайыс соңында жеңіске жетті.

Келесі сайыс ол студенттік кеңестің бастауымен  дәстүрлі түрде өтетін «Алтын күз-2016» байқауы. Байқауға жатақхананың әр қабатынан жұптар шығып, түрлі кезеңде бақ сынайды. Байқау соңында факультеттің «Күз ханзадасы-2016» - Дарын Абжанов, ал «Күз ханшайымы-2016» - Малинура Мусаева атанды.

Өткізілген іс-шаралардың әділ-қазылар мүшесінің қатарында: биология және биотехнология факультетінің деканы б.ғ.д., профессор Б.Заядан, ректораттың тәрбие бөлімінен А. Алиева, декан орынбасары М.Нармұратова, факультеттің аға куратор эдвайзері С.Шарахметов, студенттік декан Р.Кенжебек және ұйым төрағалары болды. Жеңімпаз студенттерге түрлі ойын-сауық орталықтары мен тамақтандыру кешендеріне жолдама берілді. Біз осындай белсенді жастарды қолдауға, студенттік өмірлерінің мәнді де, қызықты өтуіне ат салысуға  әрқашан да дайынбыз!

Саят Шарахметов

Биология және биотехнология факультетінің

 аға куратор- ұйымдастырушысы