«WarCraft DOTA» киберспортынан қалалық турнир өтті

«WarCraft DOTA» киберспортынан қалалық турнир өтті

2010 жылдың 4-сәуірінде Әл-Фараби атындағы ҚазҰУ-дың Жастар интернет орталығында ҚазҰУ Студенттер сенаты жанындағы Стратегиялық даму орталығының ұйымдастыруымен, «FAB//S» жастар киім үлгісі мен «Legalny» хип-хоп киім дүкенінің қолдауымен «WarCraft DOTA» ойыны бойынша ЖОО арасында калалық сайыс өткізілді. Сайысқа Алматы қаласындағы ЖОО-дан 16 команда қатысты: АЭБИ, Еуразиялық нарық институты, ҚазККА, ҚазҰМУ, Гете атындағы Қазақстан-неміс университеті, Қазақстан қоғамдық университеті, ҚМЭБИ, Халықаралық Бизнес Академиясы, Халықаралық ақпараттық технологиялар университеті, UIB.

Сайыстың мақсаты: қазіргі таңдағы жастар арасында танымал киберспорттың Алматы қаласында дамуына үлес қосу.

DOTA – әрбір ойыншы бір кейіпкерді басқаратын, стратегия жанрындағы командалық тактикалық ойын. Ойын барысында уақыт өткен сайын әрбір ойыншы өз қимылдарының сәттілігіне байланысты жаңа деңгейлерге ие болып отырады. Екі команда ойыншыларының негізгі міндеті – қамалдармен қоршалған қарсыласының лагерін жою.

Командалар жүлделі орындар үшін, ең бастысы – сайыстың Кубогы үшін бар мүмкіндіктерін ортаға салды. Қаламыздың ең үздік ойыншылары жиналғандықтан сайыс өте тартысты өтті.

Сайыстың соңында жарысқа қатысушылар төмендегідей нәтиже көрсетті: 1-орынды Халықаралық бизнес университетінің “UIB” командасы, 2-орынды Халықаралық бизнес академиясының “MAB – 2” командасы, 3-орынды АЭБИ-дің “AIPET ” командасы иеленді. Қатысушылар қаржылай сыйлықтармен қатар демеушілер ұсынған жеңілдіктерге ие болды.

Аталған сайыс қаламыздың киберспорттағы дәстүріне айналып, алдағы жылдары жаңа сайыскерлерді көреміз деген сеніміміз бар.