ҚазҰУ-да «Өнегелі өмір» сериясымен белгілі психолог-ғалым, мемлекет және қоғам қайраткері Төлеген Тәжібаевқа арналған кітаптың тұсаукесер рәсімі өтті.
Салтанатты шараны ҚазҰУ-дың бірінші проректоры Мухамбетқали Бүркітбаев ашып, академик Төлеген Тәжібаевтың Қазақ ағартушыларының психологиялық көзқарасын қазақ психологтарының ішінен бірінші болып зерделеген көрнекті қоғам және мемлекет қайраткері, психолог-ғалым болғанын атап өтіп, ғалымның атқарған мемлекеттік қоғамдық қызметіне тоқталды.
Төлеген Тәжібаев Қазақстанда психология ғылымы саласында тұңғыш рет 1939 жылы Ленинград қаласында «К.Д.Ушинский – Ресейдегі педагогикалық психологияның негізін салушы» тақырыбында кандидаттық диссертация қорғап, көп жылдар бойы қазақ ағартушылары Шоқан Уәлиханов, Абай Құнанбаев, Ыбырай Алтынсариннің психологиялық және педагогикалық көзқарастарын зерттеуге арналған бірнеше монографиялық еңбектер жазды. 1962 жылы Т. Тәжібаев тұңғыш рет Қазақстанда педагогика тарихынан докторлық диссертация қорғады.
«Өнегелі өмір» сериясы кітапбының салтанатты тұсау кесеріне қоғам қайраткерлері, ғалымның туыстары мен жақындары, ғалымдар, студенттер қатысты. Жиналған жұрттшылық Төлеген Тәжібаевтың өмірі мен қызметіне арналған бейнероликті тамашалап,Қазақстан Республикасы жазушылар Одағының мүшесі Манарбек Ізбасар мемлекет және қоғам қайраткері Т.Тәжібаев туралы баяндамасын тыңдады. Ғалымның шәкірттері ұлағатты ұстазының адамгершілігі мен соңына қалдырған жалпы психология, педагогика психология тақырыптарына арналған еңбектері жөнінде баяндады. Салтанатты шара иелері ғалымның өмірі мен еңбектерін зерттеп жүрген шәкірті Жолмұқан Төкеновке ұлттық дәстүр бойынша шапан жапты.
Философия және саясаттану факультетінің деканы Әлия Масалимова факультет тарапынан атқарылып жатқан жұмыстарды тілге тиек етіп, студенттерге 2010 жылдан бастап педагогика және психология кафедрасы тағайындаған Төлеген Тәжібаев атындағы кезекті шәкіртақы иегерлерін атады. Олар – докторант Жанерке Айдосова, 3-курс студенті Жадыра Бексейіт және Гауһар Темірова.
«Өнегелі өмір» сериясы бойынша жарыққа шыққан кезекті 69 кітапта Төлеген Тәжібаев туралы алпысқа тарта мақала мен естелік, 100-ден астам фотосурет және мұрағат құжаттары, сонымен бірге өмірі мен қызметінің негізгі кезеңдері қамтылып, шәкірттері мен әріптестерінің естеліктері берілген.
Баспасөз қызметі
Басқа жаңалықтар
