Көңілге көктем сыйлаған «Сұңқар»

ҚазҰУ-дағы eң креативті жобалардың бірі – «Сұңқар» кубогы КВН чемпионаты өз мәресіне жетті.

Әзілмен әрленген ақтық сында Филология және әлем тілдері факультетінің «Филфак құрамасы», Философия және саясаттану факультетінің «Әлем.кз», Заң факультетінің «Юрstyle», Механика-математика факультетінің «Мехмат құрамасы», Физика-техникалық факультетінің «Физтех құрамасы» мен Шығыстану факультетінің «Класстастар» командасының таланттары тартысқа түсті.

Алғашқы айналым «фристайлда» (еркін сайыста) командалар үздік деген әзілдерін ойнап, жиналған жұртшылықты қыран-топан күлкіге қалдырды. Екінші «Сұрақ-жауап» ширату кезеңінде қатысушылар әзіл-шынын араластырып бір-бірінің сұрақтарына жауап берді. Финалдың ең қызықты кезеңі – «Анимациялық дыбыстау» cайысында кино немесе мультфильм үзіндісін өз дауыстарымен құбылтты.

Қызыққа толы әзіл кешінің шешуші нүктесін қою ҚазҰУ қалашығының директоры Әбдіқаһар Сейітжанов, әнші Жігер Ауыпбаев, белгілі әзілкеш Дастан Қалдыбай, «Сұңқар» студенттер мен магистранттар кәсіподағының төрайымы Шұғыла Мейрамбекқызы сынды қазылар алқасына жүктелді.

Көрерменге көркем көңіл сыйлаған сайыскерлер сый-сияпатсыз қалмады. Қатысушыларға қанат бітіріп, қолдау білдірген кештің «ең үздік жанкүйерлері» марапатына «Физика-техникалық» факультеті лайықталып, тәттімен көмкерілген гүл шоқтарына ие болды. Ал үрдіске айналған үздік ойыншыны «Мехмат құрамасының» «әртісі» Нарық Белібаев пен «Филфак құрамасының» көшбасшысы  Қайрат Ариятов алып, ойыншыларға Анталияға жолдама табысталды. Кештің сәнін келтірген «Юрstyle» командасының мүшесі Елікай Бутебай мен «Әлем.кз» командасының мүшесі Ернар Жайлаубеков «Miss and Mr Квн» аталымын иеленді. Өзінше ерек «Класстастар» командасы 3-орын алып, Ыстықкөл  спорттық-сауықтыру лагеріне жолдама алды. Орынды ойын көрсеткен «Мехмат құрамасы» сайыста 2-орыннан көрінді. Ендігі кезекте олар Астана қаласына сапарға шығатын болады. Айтулы ақтық сайыста қағытпа қалжыңы мен әдемі әзіл тарту еткен «Филфак құрамасы» «Сұңқар кубогын» жеңіп алып, 200 000 теңге көлемінде қаржыны қанжығалады. 

Жеңімпаздарды шын жүректен құттықтаймыз!

"Сұңқар" студенттер кәсіподағы