Асқар Құлыбаевтың «Өнегелі өмірі»

«Қазақ университеті» баспасы мемлекет және қоғам қайраткері, профессор, ҚР ҰҒА, ХИА және ҰИА академигі, техника ғылымдарының докторы, ҚР Бейбітшілік және келісім кеңесінің төрағасы, «АКА групп» компаниясының президенті, «Мұнайшы» қоғамдық қорының қамқоршылар кеңесінің төрағасы Асқар Алтынбекұлы Құлыбаевтың өмірі мен қызметі, ғылыми шығармашылық жолына арналған кітапты жарыққа шығарды.

Аталмыш кітап университет ректоры Ғалымқайыр Мұтановтың басшылығымен 2011 жылдан бастап қолға алынған әл-Фараби атындағы Қазақ ұлттық университетінің танымал «Өнегелі өмір» кітап сериясының арнайы шығарылымы болып табылады.

Кітапта А. Құлыбаевтың өмір жолы мен қызметі жайлы өмірбаяндық мағлұматтар, мақалалары, баяндамалары, естеліктері мен әр жылдардағы суреттері көрініс табады. Балалық және жастық шағы, Асқар Құлыбаевтың ата-анасы, туып-өскен жері, отбасы, балалары мен немерелері туралы қысқа ақпараттар мен әсерлі әңгімелері келтірілген бөлім оқырмандардың ерекше қызығушылығын оята түспек. Сондай-ақ, кітаптан оның бірге қызмет еткен әріптестерінің, замандастары мен достарының эссе, лебіздерін, жүрекжарды ізгі тілектері мен ерекше естеліктерін оқуға болады.

Асқар Құлыбаевтың жүріп өткен жолы мен адами асыл қасиеттерін өскелең ұрпақ, жас буынға өнеге ету мақсатында айтулы кітап шығарылып отыр.

Баспасөз қызметі