26 тамызда әл-Фараби атындағы Қазақ ұлттық университетінде ректор грантының иегерлері анықталды. Биыл ректор грантының иегері былтырғыдан қарағанда бес есе артып, 90 балаға ҚазҰУ ректорының гранты табыс етілді.
ҚазҰУ студенттерінің қатарына қосылған білімгерлерді құттықтау барысында ректор Бақытжан Жұмағұлов: “Биыл 3200 мемлекеттік білім гранты иегерін оқуға қабылдаған ҚазҰУ жетекші білім ордасы ретінде отандық білім кеңістігіне жанашырлық танытып, тағы 90 балаға ректор грантын тапсырып отыр. Олардың арасында 64 “Алтын белгі” иегері қалғандары халықаралық, республикалық олимпиадалардың жеңімпаздары. Ерекше мәртебелі белгіге ие болу қабілет пен дарынды қажет ететіндігін ескере отырып, үздік талапкерлерді назардан тыс қалдырғымыз келмеді. Бұл талапкерлер мемлекеттік байқау кезінде таңдаған мамандықтарына грант бөлінбей қалғаны үшін жазықты емес. Сол үшін біз – университет ғалымдары, декандары мен оқытушы-профессорлар құрамы ақылдаса келіп осындай ұйғарым қабылдадық. Оларға университет жыл сайын 67 млн. қаржы бөледі”, - деген пікірін жеткізді.
Қазақстанның білім кеңістігінде көп салалы университеттер көшін бастап тұрған білім шаңырағының грантына ие болған білімгерлер өз қуаныштарын жасырып қалмады. Осы орайда ректор грантына ие болған «Алтын белгі» иегерлері атынан Шыңғыс Сейдалиев, Анастасия Даниленко және Мадина Жакитовалар алғыстарын жеткізді. «ҚазҰУ менің бала күннен бергі арманым. Мен бүгін өте қуаныштымын. Еліміздегі бірінші университетке түсу үшін мен мектепте үнемі ізденіс пен үздік оқу үстінде болдым. Міне, сол еңбегім бүгін жүзеге асты. Мамандық таңдаудағы арманымның шындыққа айналуына қолдау көрсетіп отырған университет ректоры Бақытжан Тұрсынұлына және ҚазҰУ ұжымына шексіз ризашылығымды айтқым келеді. Студенттік жылдарымда Қазақстанның бәсекеге қабілетті маманы болып қалыптасып шығатыныма сенемін. ҚазҰУ- ды таңдау, ҚазҰУ-да оқу барлық жетістіктерге жетелейді», - дейді Мадина Жакитова. Аталмыш университеттің заң факультетіне қабылданған Мөлдір Бақытжанқызы өнерінен шашу шашып, ризашылығын әнмен өрнектеді.
Үздік университеттің студент қатарына қабылданған білімгерлердің ата- аналары атынан сөз алған Төреханова Гаухар Аманжолқызы: “Біз ҚазҰУ- ды отандық университеттердің көшбасшысы ретінде жақсы танимыз. Мұнда жоғары білікті оқытушы-профессорлар ұжымы, заманауи технологиялар мен ғылыми зерттеу орталықтары орналасқан. Бұл университеттерде студенттердің білім алуы мен қабілетті кадр болып даярлануына барлық жағдай жасалған. Осы университеттің студенті атанған баламыздың болашағына сеніміміз мол. Алаңымыз жоқ”, - дейді.
Болашаққа деген айқын сенімге жолдама алған ректор грантының иегерлерінің көңілі марқайып, толқыған шаттықтарымен бөлісіп, кезек-кезек өнерлерін паш етіп, нағыз үздік талапкерлер екендігін дәлелдеп жатты.
Үздік оқыған оқушы – бүгін ҚазҰУ студенті. Олар Қазақстанның болашақ элитасы. Шараға келген қонақтар: “Мектеп ұжымы қанаттандырған сапалы студент – әл-Фараби атындағы Қазақ ұлттық университетінен сапалы маман болып қанаттанады” деген сеніммен тарасты.
ҚазҰУ-дың Баспасөз қызметі
Басқа жаңалықтар
