Әл-Фарабидің 15-томдық кітаптар топтамасы шықты
Қазақстан Республикасының Ұлттық кітапханасында әбу Насыр әл-Фарабидің 1150-жылдығына арналған бірегей 15-томдық кітаптар топтамасының тұсаукесер рәсімі өтті.
Абай атындағы халықаралық клуб және әл-Фараби атындағы ҚазҰУ жанындағы әдебиет және әлем халықтары институты әбу Насыр әл-Фарабидің 1150-жылдығына арналған 15-томдық бірегей кітаптар топтамасын жарыққа шығарды. Жинақтың құрастырушы авторы белгілі жазушы Роллан Сейсенбаев.
Үш тілдегі көп томдық басылымға Шығыс ойшылының еңбектері енгізілген: «Ақыл туралы кітап», «Философиялық трактаттар», «Әлеуметтік-этикалық трактаттар», «Музыканың үлкен кітабы», «Жаратылыстану ғылыми трактаттар», «Ұстаздың оралуы», «Әлеуметтік-этикалық трактаттар», «Музыка туралы үлкен кітап», «Ғылым туралы кітап». Олардың көпшілігі ерекше құнды еңбектер. Себебі олардың басым бөлігі қалың оқырмандарға таныс емес. Мерейтойлық жыл қарсаңында әбу Насыр әл-Фарабидің мұрасы бүкіл әлемде кеңінен насихатталуда, ал оның еңбектері түрлі елдерде басылып шығарылуда.
«Әл-Фарабидің философиялық трактаттарын түсіну оңай емес, сондықтан біз оларды жас оқырмандар мен студенттерге ыңғайлы етіп жасадық. Егер ұлы ойшылдың кітабын жастық шақта оқып, оны қартайғанда қайта оқып шықса, онда оқырман оны мүлде басқаша қабылдайды. Оның еңбектері баға жетпес, әрі жас және өскелең ұрпаққа үлкен білім береді», - деді Роллан Сейсенбаев тұсаукесерде.
Әл-Фараби атындағы ҚазҰУ Шығыс ойшылының еңбектеріне сүйене отырып, білім мен руханилықтың интеграциясы негізінде жастардың моральдық-өнегелік тәрбиесінің жаңа моделін жасады. Қазіргі уақытта БҰҰ-ның Өркениеттер Альянсымен бірлесіп «Қайырымды қоғам азаматтарын қалыптастыру» жобасы жүзеге асырылуда.
Қазіргі заманда әл-Фараби тұжырымдамасы қоғамның тұрақты дамуындағы университеттің миссиясын халықтың тәрбиешісі, тәлімгері және ұстазы ретіндегі «қайырымды қала» басшысының рөлі арқылы түсіндіруге мүмкіндік береді. Мұндай тәлімгерлікті қазіргі университеттер жүзеге асыра алады және енгізулері керек. Осыған байланысты әл-Фараби шығармаларын тарату барлық елдер мен халықтар үшін аса өзекті және маңызды миссия.
Әл-Фарабидің бірегей еңбектерінің жарық көруі өскелең ұрпақты тәрбиелеуде және Шығыстың екінші ұстазының рухани мұрасын насихаттауда үлкен мәнге ие.
ҚР Тұңғыш Президенті-Елбасы Нұрсұлтан Назарбаев айтқандай: «Біздің бүгініміз бен болашағымызға көп нәрсе бере алатын ақылды кітаптар қорын құру – байсалды көзқарасты талап ететін аса жауапты міндет».
Басқа жаңалықтар
