«Алаш айнасы» республикалық қоғамдық-саяси ақпараттық газет

Ауғандық жастар Мұқағалиды жатқа оқыды

Әл-Фараби атындағы ҚазҰУ-дың шетел азаматтарына арналған дайындық факультетінің тыңдаушылары қазақтың ақиық ақыны Мұқағали Мақатаевтың 80 жылдық мерейтойына орай «Мен өмірді жырлау үшін келгенмін» атты жыр кешін ұйымдастырды.

Жыр кеші дайындық факультетінің тыңдаушысы Жазигүл Қанаштың ақын өмірі мен шығармашылығына арналған баяндамасымен ашылды. Шара барысында ҚР Президенті бағдарламасымен университетімізде білім алып жатқан Ауғанстан Ислам Республикасынан келген тыңдаушылар ақын өлеңдерін мәнерлеп оқудан сынға түсті. Қазақ жеріне келгендеріне төрт ай ғана болған, тілді енді ғана меңгерген ауған жастары ақын өлеңдерін тебірене жырлап, көрермендерді тәнті етті. Жарысқа қатысқан 13 тыңдаушының ішінен харун Корризадах- бірінші орынды, Сайд Ахмад Хусайн мен Мохаммад Найм Мохамади –екінші орынды, Абдулла Ахмади мен Мохаммад Риза Ризай үшінші орынды иеленді. Кеш соңы факультетте білім алып жатқан қазақ диаспорасы өкілдерінің, филология, журналистика факультетінің, Абай атындағы ҚазҰПУ-дан келген жас ақыннын Мұқағалиға арналған өлеңдерін оқумен жалғасты. Жеңімпаздарды дайындық факультетінің деканы Ж.Молдағалиева, ЖОО-ға дейінгі дайындық кафедрасының меңгерушісі, профессор Қ.Аққошқарова, «Қазақ әдебиеті» газетінің тілшісі Әлібек Байбол, «Парасат» клубының жетекшісі Ж.Ибраимова мен С.Нүсіпбаева, клубтың модераторы д.Тұрсынқұлова марапаттап, сыйлықтар тапсырды. Ұйымдастырушылар «мұндай әдеби-танымдық шаралар алдағы уақытта да жалғасын табады» дейді.

Өз тілшімізден