"ҚазАқпарат" Ұлттық ақпарат агенттігі

ҚазҰУ-де физика факультетінің заманауи жаңа оқу ғимараты салтанатты түрде ашылды

АЛМАТЫ. 1 наурыз. ҚазАқпарат /Әділет Мұсахаев/ - Бүгін бірінші халықаралық Жолдасбеков симпозиумы аясында Әл-Фараби атындағы Қазақ ұлттық университетінде физика факультетінің соңғы құрал-жабдықтармен қаматамасыз етілген заманауи жаңа оқу ғимаратының салтанатты ашылуы өтті.

Ашылу салтанатына ҚР Білім және ғылым министрі Б.Т. Жұмағұлов, Әл-Фараби атындағы ҚазҰУ ректоры Ғ.М. Мұтанов, Қазақстан Республикасының жетекші ғалымдары мен қара шаңырақ ұжымы факультеттегі зертханаларды аралап, соңғы технологиялық жабдықтармен танысты.

Әл-Фараби атындағы Қазақ ұлттық университеті - Қазақстандағы ірі білім мен ғылым орталығы, жоғары кәсіби, жоғарғы оқу орнын тәмамдағаннан кейінгі білім мен ғылымды инновациялық дамытудың көшбасшысы. Оқу орнының физика факультеті - физика ғылымдары саласында жоғары білікті мамандарды дайындау бойынша кеңінен танылған тәлімді ғылыми орда. Үздік ғылыми физика мектептерінің дәстүрін сақтай отырып, факультетте 30-дан аса ғылым докторы, профессорлар мен 100-ден аса ғылым кандидаты, доцент жұмыс жасайды. Олардың ішінде Ғылым мен техниканың қайраткерлері, ҚР ҰҒА, ХҒА академиктері, Мемлекеттік стипендиялардың жүлдегерлері, түрлі жылдардағы «ЖОО үздік ұстазы» гранттарының иегерлері бар. Физика факультеті 17 шетелдік ЖОО-мен (Германия, Англия, АҚШ, Испания, Италия, Ресей, Жапония) бірлесе отырып, теориялық және қолданбалы физика саласындағы мамандарды дайындайды.

Әл-Фараби атындағы ҚазҰУ физика факультетінде базалық білім ретіндегі мамандыққа ие талантты жас физик-мамандар бүгінгі таңда АҚШ, Ұлыбритания, Канада, Германия, Франция, Жапония және т.б әлемнің өзге елдерінде өз білімдерін жалғастыруда және жұмыс жасауда екен. Көптеген факультет түлектері танымал белгілі ғалым атанып, Қазақстан мен шетелде физика және қолданбалы технологияның дамуына аса зор үлес қосып жүр. Мұнан өзге мақтан тұтарлық базалық физикалық білім мен бизнес және мемлекеттік басқаруда да үлкен жетістіктерге жетуге мүмкіндік жасаған атақты түлектер бар.