«Ғылым әлемі» жас ғалымдар конференциясының жеңімпаздары анықталды

16-22 сәуір аралығында әл-Фараби атындағы ҚазҰУ-да студенттер мен жас ғалымдардың «Ғылым әлемі» атты халықаралық конференциясы өтті. Бұл шара ҚР Тәуелсіздігінің 20 жылдығына арналған болатын. Конференцияның жабылу салтанаты 22 сәуірде ҚазҰУ-дың механика-математика факультетінде тәмамдалды.

Конференцияны ұйымдастырудағы басты мақсат - студенттердің ғылыми-зерттеу және оқу-ағарту қызметін дамыту, жас ғалымдардың ғылым саласындағы өзекті мәселелерін шешудегі ұсыныстарын тыңдау, әрі талантты жастарды қолдай отырып интеллектуалды элита ортасын қалыптастыру.

Конференцияның жабылу салтанатына университет басшылығынан ғылыми жұмыс жөніндегі проректор Тілекқабыл Рамазанов және 14 факультеттің декандары қатысты.

- Бұл жастар арасында дәстүрлі түрде жалғасын тауып келе жатқан конференция. Жас талантты ғалымдарды жаңалық ашуға үндейтін бірден бір іс. Жастардың бұл игі бастамасына қолдай отырып, отандық ғылым саласын дамытуға бар үлесімізді қосуымыз керек, - деді проректор ашылу рәсімінде.

14 факультет бойынша дене шынықтыру және спорт кафедрасында 69 секция жұмыс істеген болатын. Оған Қазақстан, ТМД елдері, АҚШ, Германия, Түркия, Үндістан, Жапониядан 2700-ден астам студент қауымы қатысты. Нәтижесінде конференция аясында 44 жеңімпаз іріктелінді. Жиында ғылымның түрлі саласы бойынша теориялық, тәжірибелік және қолданбалы сипаттағы баяндамалар оқылды. Сондай-ақ бағдарлама аясында ашық есік күндері, интеллектуалды ойындар, PR агенттіктерінің тұсаукесерлері, белгілі ғалымдар мен саясаткерлердің басқосуы, алқасөз жиыны, ғылыми пікірталастар, шеберлік дәрістері, көрме, шешендік өнер сайыстары өтті.

Жеңімпаздарға І, ІІ, ІІІ дәрежелі диплом мен ақшалай сыйлық берілді.

ҚазҰУ-дың Баспасөз қызметі