ҚазҰУ-дың студенттері Эрзинджан университетіне барады

26 сәуірде ҚазҰУ шығыстану факультетінің түркітану кафедрасына Түркия Республикасы Эрзинджан университетінің ғалымдары келіп қайтты.

Өкілдер құрамында Эрзинджан университеттің ректоры Ильяс Чапоглу, проректоры Фахри Таш және халықаралық қатынастар департаментінің директоры Реджеп Гулмез болды. ҚазҰУ шығыстану факультетінің деканы профессор Нұржамал Алдабек факультет және кафедра қызметімен таныстырды. Түркітану кафедрасының меңгерушісі профессор Раушан Авакова кафедраның тарихы, оқытушылар құрамы мен кафедраның қызмет бабына тоқталып өтті.

Эрзинджан университетінің ғалымдары ҚазҰУ шығыстану факультетінің түркітану бөлімінде оқитын студенттерімен алқасөз өткізді. Түркиядағы оқу үдерісі, оның жүйесі, екі жақты келісімшарт негізінде студенттердің Түркияда білімін жалғастыруы, кредиттік жүйе туралы бірқатар мәселелер талқыланды. Түрік тілі бойынша өткен олимпиаданың жеңімпаздары биыл жазғы семестрде Эрзинджан университетіне білім алмасуға барады.

ҚазҰУ-дың Баспасөз қызметі