Нагиб Махфуздың 100 жылдық мерейтойына орай халықаралық конференция болып өтті

27-28 сәуірде шығыстану факультетінде арабтану кафедрасы және Египет мәдениет орталығының ұйымдастыруымен Нобель сыйлығының лауреаты, атақты Египет жазушысы Нагиб Махфуздың 100жылдық мерейтойына орай «Нагиб Махфуз: шығыс мәдениетінің зердесі» атты халықаралық конференция болып өтті.

Конференцияны Египет мәдени орталығының басшысы Мухаммад Сухейми Субхи мырза ашты. Құрметті қонақтар арасында «Нур-Мубарак» Египет ислам мәдениеті университетінің ұстаздары, Абылай хан атындағы Қазақ халықаралық қатынастар және әлем тілдері университетінің, Абай атындағы Қазақ Ұлттық педагогикалық университетінің ұстаздары болды. Конференция бағдарламасы бойынша, алғашқы күні пленарлық мәжілістен кейін Мысыр жазушысы, Нобель сыйлығының лауреаты Нагиб Махфуздың өмірбаяны, шығармашылығы, туындылары жайлы баяндамалар тыңдалды.

Конференцияның екінші күні Египет мәдени орталығында жалғасты. Бұл күні Нагиб Махфуз шығармаларына негізінде Мысыр елінде түсірілген фильмдер жайлы қысқаша кіріспе сөзден кейін атақты жазушының көзі тірісінде түсірілген документальды фильм көрсетіліп, оның соңы көркем фильмдерге ұласты. Сонымен қатар, конференцияға қатысушылар ұлы жазушы кітаптарының көрмесімен танысты.

ҚазҰУ-дың Баспасөз қызметі