"Ұлылардың ұрпағы" деректі фильмінің тұсауы кесілді

19-мамыр күні ҚазҰУ-дың журналистика факультетінде филология ғылымдарының кандидаты, телевизиялық және радиожурналистика кафедрасының доценті Жидегүл Әбдіжәділқызының «ҰЛЫЛАРДЫҢ ҰРПАҒЫ» атты Жұбановтар әулеті жайлы түсірген деректі фильмінің тұсаукесер рәсімі өтті.

Фильмнің тұсаукесеріне журналистика факультетінің деканы Есберген Алауханов, фильм кейіпкерінің қызы Ажар Жұбанова, композиторлар Гүлнәр Дәукенова, Донеділ Қажымов және биология факультетінің деканы Тамара Шалахметова, заң факультетінің деканы Дәурен Байділдинов арнайы келді.

18 минуттық деректі фильм аясында тіл білімі саласындағы алғашқы қазақ профессоры, түркітанушы, педагог Құдайберген Қуанұлы Жұбанов, қазақтың тұңғыш кәсіби музыканты, өнертану саласындағы алғашқы академик Ахмет Жұбанов, Қазақстанның еңбек сіңірген өнер қайраткері, композитор Ғазиза Жұбанова, техника ғылымдарының докторы, профессор Қайыр Ахметұлы Жұбанов, биология ғылымдарының докторы, профессор Ажар Ахметқызы Жұбанова жайлы жалпы деректер ұсынылды. Қазақ елінің өнер өрісі мен білім көкжиегіндегі, ғылым аясындағы Жұбановтар әулетінен тараған ұрпақтың қалдырған қолтаңбасы мен қосқан үлесі, сонымен қатар, Ахмет Жұбанов атындағы дарынды балаларға арналған қазақ орта мамандандырылған музыка мектеп-интернатының әлемдік деңгейдегі жетістіктері баяндалды. Фильм авторы әрі режиссері Жидегүл Әбдіжәділқызының ойға алған туындысы өз нәтижесін орайлы шеше білді.

ҚазҰУ-дың Баспасөз қызметі