Биыл ҚазҰУ-ға жазғы оқу семестріне шетелдер мен қоса Қазақстанның ЖОО-ның студенттері де келіп білім алуда. Оқуға қажетті құжаттарды тапсыруда сырттан келген студенттерінің бірі Қазақ ұлттық университетінің студенттік өзін-өзі басқару жүйесімен танысқысы келетіні туралы айтып қалды. «Тәжірибені онымен бөлісу арқылы ғана жинақтай аласың» деген ұстаныммен жүретін ҚазҰУ белсенділері қуана-қуана қонақтармен кездесетін күнді белгілеп, өз жұмыстарымен таныстыруға әзірлікті бастап кетті.
20 маусым күні Қарағанды экономикалық университеті, Студенттік Парламентінің өкілдерімен ҚазҰУ-дың Студенттер Сенатының өкілдері кездесті. әл-Фараби атындағы ҚазҰУ Жастар ұйымдары комитетінің жұмысымен таныс болған қонақтар, өз университетіндегі студенттік өзін-өзі басқару жүйесін де айта кетті. Сондай-ақ, студенттік кездің жаңа достарын тапқан білімгерлер ҚазҰУ белсенділерімен ұйымдастырылған «Калипсо» ойынын ойнауға кірісті. Ойын шарты бойынша 4 командаға бөлінген студенттер қалашық территориясында жасырылған тапсырмаларды бірінен соң бірін тауып, ондағы жасырылған сұрақтардың жауабын шешу арқылы соңғы нүктеде кездесу керек. Осылайша, келген кезегі бойынша жеңімпаз командалар анықталып, қонақтарымызға ҚазҰУ Студенттер Сенатының төсбелгісі мен университетіміздің 75 жылдығына орай шығарылған диск табыс етілді. Біліммен қатар тәжірибе және жаңа достар жинақтаған Қарағанды экономикалық университетінің көшбасшылары ҚазҰУ белсенділерінен өз оқу орнына жалынды сәлем алып қайтты.
ҚазҰУ-дың Баспасөз қызметі
Басқа жаңалықтар
