«ҚазАқпарат» Ұлттық ақпарат агенттігі

ҚазҰУ-де жаңа оқу жылы дәстүрлі көшбасшылық дәрістермен басталды

АЛМАТЫ. 1 қыркүйек. ҚазАқпарат /Әділет Мұсахаев/ - Әдеттегідей, биылғы жаңа оқу жылы да әл-Фараби атындағы Қазақ ұлттық университетінде ғылым және саясат саласының ең үздік өкілдері мен қазақстандық және халықаралық бизнес-бірлестік басқарушыларының көшбасшылық дәрістерімен басталды.

Студенттерге дәріс оқыған лекторлардың арасында ҚР Төтенше және Өкілетті елшісі Ақмарал Арыстанбекова, шығыстанушы ғалым, қоғам қайраткері Мұрат Әуезов, ҚР ҰҒА академигі, ҚР Ұлттық инжинерлік академиясының бірінші вице-президенті Нәдір Нәдіров, «КазЭкология» бас директоры Амангелді Сқақов, «Жалпы генетика институтының» директоры Лейла Жансүгірова, Ш.Уалиханов атындағы Тарих және этнология институтының директоры Ханкелді Әбжанов, ҚР Президент Аппараты баспасөз орталығының басшысы Валерий Жандаулетов, «Айқын» газетінің бас редакторы Нұртөре Жүсіп, «Физика-математика орталығының» Бас директоры Тынысбек Қалменов, техника ғылымының докторы, академик Болат Мұқашев, философия ғылымдарының докторы, профессор Сағадат Бөлекбаев және тағы да басқа мамандар бар.

Кезекті оқу жылының алғашқы дәрісінен бастап көшбасшылыққа бағыт алған студенттердің болашағы да зор болмақ.

«Көшбасшылық» және «University Life» бағдарламасын өткен бірінші курс студенттері бұдан кейін KPMG компаниясының аға кеңесшісі Жанат Бердалинаның дәрісін тыңдады.