«Тілдер» фестивалі жабылуы салтанатты түрде өтті

27 қыркүйек жалпыуниверситеттік «Тілдер» фестивалінің жабылу салтанаты өтті. Бір аптаға созылған фестивальге туған тілдің тұнықтығын сақтаған, бірнеше тілді жетік меңгерген, жүзден жүйрік озып шыққан білікті де білімді жастар мен университет қызметкерлері қатысты. Университет ректоры, академик Ғалымқайыр Мұтанұлы Мұтанов бірінші рет университет деңгейінде ұйымдастырылып отырған «Тілдер» фестивалі аясында өткізілген іс-шаралардың барлығына ризашылығын білдіріп, фестиваль жеңімпаздарын дипломмен және арнайы сыйлықтармен марапаттады.

Қазақстан Республикасы Тәуелсіздігінің 20 жылдығы қарсаңында өткізілген «Тілдер» фестивалінің алғашқы жеңімпаздары:

«Тілге құрмет – елге құрмет» прозалық шығармалардың жеңімпазы филология факультетінің 1-курс студенті Асылан Тілегенов, «Ана тілім - ардағым» поэзиялық шығармалар байқауының жеңімпазы филология факультетінің 1-курс студенті Шерхан Талапов; «Абай оқулары» байқауының жеңімпаздары шығыстану факультетінің 4-курс студенті, араб тілінің маманы Есен Айтмағанбетов, шығыстану факультетінің 3-курс студенті парсы тілінің маманы Ботакөз Төлімбет, шығыстану факультеті факультетінің 2-курс студенті түрік тілінің маманы Ақтілек Тоқтасынова, экономика және бизнес жоғары мектебі факультетінің 1 курс студенті Адина Бабаева; «Батыс тілдерінің білгірі» байқауының жеңімпазы халықаралық қатынастар факультетінің 3-курс студенті Қанат Әзімханов; «Шығыс тілдерінің білгірі» байқауының жеңімпаздары, шығыстану факультетінің 4-курс студенті хинди тілінің маманы Мерует Пернеқұлова, 2-курс студенті түрік тілінің маманы Маржан Сабырбекова, 2-курс студенті урду тілінің маманы Мадина Әлібаева, 2-курс студенті корей тілінің маманы Меруерт Нұрпейісова, 3-курс студенті жапон тілінің маманы Гүлжан Бекмұхамбетова, 1-курс студенті қытай тілінің маманы Аякөз Болат; «Мемлекеттік тілдің ең үздік білгірі» олимпиадасының жеңімпаздары химия факультетінің 2-курс студенті Алуа Нұрмағанбетова, журналистика факультетінің 1-курс студенті Вескина Екатерина; Департамент қызметкерлері арасындағы «Мемлекеттік тіл – іскери тіл» байқауының жеңімпазы Ғылым және инновация департаментінің «Ғылым» тобы.

Барлық жеңімпаздарды шын жүректен құттықтаймыз.

Қазағымның көктен күліп ай-күні,

Болашақтың кеңи берсін айдыны.

Көк аспанда көк жалауы желбіреп,

Ана тілдің асқақтасын айбыны!

Тәрбие жұмысы жөніндегі департамент