«Ректор кубогі» жеңімпаздары марапатталды

Әл-Фараби атындағы ҚазҰУ бірінші курс студенттері арасында Қазақстан Республикасы Тәуелсіздігінің 20-жылдығына арналған «РЕКТОР КУБОГІ» жүлдесі жарыстарының жеңімпаздарын марапаттау-спорттық мерекесі өтті.

8 қазан күні әл-Фараби атындағы ҚазҰУ спорткешені стадионында 1-курс студенттері арасында Қазақстан Республикасы Тәуелсіздігінің 20-жылдығына арналып «РЕКТОР КУБОГІ» жарыстарының жеңімпаздарын салтанатты түрде марапаттау рәсімі өткізілді.

«Бүгін барлығымыз бірігіп, жақсы дәстүрді бастап отырмыз. Биылдан бастап, ректор кубогына 1-курс студенттері арасында спартакиада өткізуді қолға алынды. Бұның басты мақсаты: денсаулыққа көңіл бөлу, жат қылықтан аулақ болу, бір-бірімізбен тек жақсылықта бірге жүру. Біз сіздермен әрқашан мақтанайық. Спартакиада да спорттың 5 түрінен жарыс болды. Бұл дәстүр алдағы уақытта, магистратура, докторантурада да жалғасын тапсын. Биік жетістіктер тілеймін, ел азаматы болыңыздар», - деді ректор Ғалым Мұтанов салтанатты марапаттау рәсімінде.

Жарыстағы ойын түрлерінен жеңімпаз атанған факульттер: шахматтан 1-орын механика-математика факультеті, 2-орын заң факультеті, 3-орын химия және химиялық технологиялар факультеті иемденсе, минифутболдан 1-орын философия және саясаттану факультеті, 2-орын халықаралық қатынастар факультеті, 3-орын химия және химиялық технологиялар факультетіне берілді. Бадминтон ойын түрінен 1-орын экономика және бизнес жоғары мектебі, 2-орын физико-техникалық факультеті, 3-орын журналистика факультеті алды. Үстел теннисінен 1-орын физико-техникалық факультет, 2-орын экономика және бизнес жоғары мектебі, 3-орын биология және биотехнология факультетінің топтарына бұйырса, стритбол спорттық ойын түрінен 1-орынды биология және биотехнология факультеті, 2-орынды экономика және бизнес жоғары мектебі, 3-орынды механика-математика факультетінің 1-курс студенттеріне берілді.

Сонымен қатар бағдарламада: спортшылардың арнайы спорттық көрсетілімдері болды. Көрермендерге арналған көрсетілімді әскери дайындық факультеті бастап, аэробика, каратэ жәе т.б. қойылымдармен қуантты. Университетіміздің 1-курс құрама командасы мен магистранттар-докторанттарының футболдан жолдастық кездесуі болды.

ҚазҰУ-дың Баспасөз қызметі