«Айқын» республикалық қоғамдық-саяси газет

10 қаңтар, 2012 жылы

Қытайда өнер көрсетті

ҚазҰУ студенттері мен қызметкерлері Ланьчжоу және Хайнань провинциясында өткен студенттік фестивальге қатысып қайтты. Бұл шара Қытай Халық Республикасының Шанхай ынтымастық ұйымына төрағалығы шеңберінде «Тату көршілік және достық жылы» ұраны негізінде ұйымдастырылды. Негізгі мақсат - ШЫҰ-ға мүше-мемлекеттердің өнерлі жастарын әлемдік сахналарда бір-біріне таныстыру, тәжірибе алмасу, болашақта тығыз қарым-қатынас жасау.

Алдымен Ланьчжоу қаласында бірнеше күн әр мемлекеттен келген студенттер өз өнерлерін көрсетіп, дөңгелек үстел басына жиналып достық қарым-қатынас орнатты. Одан кейін Хайнань провинциясының Санья қаласында Санья университетінде фестивалдің ашылуына қатысып, қазақтың әсем әнін, күмбірлеген домбырасын, қоңыр үнді қобызын танытып жалпы жұртты тәнті етті.
Фестиваль барысында Қытай, Ресей және Қырғыз елі университеттерінен студенттер қатысты. ҚазҰУ-дың өнерпаздары бұл концертте де аянып қалмады. Түрлі жанрдағы шығармалар орындап, көпшіліктің көңілінен шықты.
Г.Сәрсенбекова, әл-Фараби атындағы ҚазҰУ-дың тәрбие жұмысы жөніндегі департамент директоры:
- Шанхай ынтымақтастық ұйымына мүше елдер жастарының басын біріктірген І халықаралық жастар фестивалінің маңызы зор. Елі, жері, тілі бөлек әлем жастарын құдіреті күшті өнер біріктірді. Қазақстан атынан барған ҚазҰУ жастары өз өнерлерімен көрермендерді тәнті етті. Ең қызығы және біз мақтанарлық жайт, фестивальға қатысқан оннан астам ЖОО ішінде музыкалық факультеті жоқ бірден-бір университет бола тұрып, фестиваль бағдарламасына концерттік номерлері көп өткен университет біз болдық. Басқа елдердің университеттерінен тағы да бір оза шапқан тұсымыз - қарсы алушы елге, мәдениетіне деген құрметімізді айшықтаған арнайы қытай әнін қытай және қазақ тілінде орындаған бірден-бір қазақ жастары болды.
Әл-Фараби атындағы ҚазҰУ делегациясы Қазақстанның бірлігі жарасқан, жастары білімді, озық ойлы, өнері өршіл, болашаққа нық сеніммен бара жатқан елінің шын патриоттары екенін көрсетіп қайтты.

Әйгерім ӘЛІМЖАНОВА,
студенттер клубының жетекшісі