"Алаш айнасы" республикалық қоғамдық-саяси күнделікті газет

Білім сапасы қайтсе артады?

Алдағы жұма күні «Бiлiм беру қызметіндегі инновациялар және оқытудың сапасын артты­ру мәселелері» атты 42-ші халық­ара­лық ғылыми-әдістемелік конференция өз жұмысын бастайды.

Аталған ғылыми басқосу негізінен Әл-­Фараби атындағы Қазақ ұлттық университетінде білім беру үдерісіндегі оқы­тудың инновациялық әдістеріне және білім сапасын көтеруге арналатын болады. Оған 400-ден астам жоғары оқу орнынан жетекші ғалымдар мен педагогтер қатысады. Оның ішінде ТМД елдері мен Түркия, Испания, Жапония, АҚШ, Ұлыбритания сынды елдердің ғылыми-зерттеу орталық­тары мен қорларының өкілдері бар.

Конференция барысы «Білім беру үде­рісіндегі инновациялық әдістер, модульдік оқыту жағдайындағы СӨЖ, МӨЖ және ДӨЖ жаңа түрлері», «Оқу үдерісін оқулық­тармен қамтамасыз ету, электрон­дық оқу құралдарын дайындау», «Өндіріс, білім беру және ғылым ықпалдастығы: акаде­мия­лық ұтқырлық, жұмыс берушілер курсы, бәсекеге қабілетті мамандар дайындау», «Жалпы білім беру пәндері мен тілдерді үйретудің технологиялары» деген бағыттар бойынша жүргізілмек. Сонымен қатар «PhD-докторантурасы мен магистратурада білім беру бағдарламаларының жүзеге асырылуы – зерттеу университетінің жетекші қызметі» деген тақырыптағы дөң­гелек үстел жиыны мен «Білім беру үдері­сіндегі ақпараттық технологияның рөлі» деген пленаралық ғылыми-әдістеме­лік семинар ұйымдастырылмақ. Конференция материалы алдағы уақытта жеке ғылыми жинаққа топтастырылмақ.