"Дала мен қала" республикалық қоғамдық-саяси басылым

ҚҰҚЫҚТЫҚ ЖУРНАЛИСТИКА: САУАТТЫЛЫҚ ПЕН МӘДЕНИЕТ

Әл-Фараби атындағы ҚазҰУ-да құқықтық журналистиканың бүгінгі күнгі маңызды мәселелерін талқылаған жиын өтті. Басқосуға еліміздің Жоғары сотының төр­аға­сы Бектас Бекназаров арнайы келді.
«Құқықтық журналистиканың даму бағыттары» деген тақырыпты арқау қылған талқы отырыста – бұқаралық ақпарат құ­ралдарында құқық, сот тақырыптарына сауатты қалам тартатын қарымды журна­листердің азайып бара жатқандығы сөз болды. Жиынға сонымен қатар Санкт-Петербург университеті журналистика факультетінің профессоры Г.Мельник, Санкт-Петербург криминологтар клубы­ның президенті Д.Шестаков, Алматыдағы бұқаралық ақпарат құралдарының басшылары мен заңгерлері және студенттер қа­тысып, өз ой-пікірлерін ортаға салды. Ал кездесудің шымылдығын университет ректоры, академик Ғалымқайыр Мұтанов кіріспе сөзбен ашып, қазіргі кезде құқық­тық журналистиканың өзекті мәселе екендігіне тоқталып өтті. Өз кезегінде, бүгінгі күні соттар мен журналистердің мақсаты бір екендігін қадап айтқан Бас судья: «Иә, Конституцияда жазылмаса да қоғамда «журналистика – төртінші билік» деген ұғым қалыптасқан. Журналистер қоғамдық сананы қалыптастырып, қоғам­дық ой тудырады. Оларға жүктелер жүк ауыр. Нақ мұндай билік, бізге де, үшінші мемлекеттік билік – соттарға да тән», – деді.
Жиында, сот процестерін баспасөз беттерінде жариялау мәселесі кеңінен сөз болды. Журналистердің көпшілігі құқық­тық салаға қатысты мәселе көтер­генде эмоцияға беріліп, соның кесірінен ақпарат халыққа бұрмаланып жетуі әбден мүмкін. Осы жайтты баса көтерген Бектас Бекна­заровқа студенттер тарапынан «жас журналистер сот органдарына барып тәжіри­беден өтсе жөн болар еді» деген ұсыныс айтты. Бұл жағынан құқықтық салада хабар тарататын журналистерді жеке дайындау керектігі де айтылды. Ұсынысты Жо­ғары сот төрағасы бірден құптап, бұл тұр­ғыда облыстық және қалалық сот­тардың төр­ағаларына тапсырма беретінін жеткізді.